Liu husi operasaun ne’ebé hala’o iha Tersa (12/02) tuku 22.00 kalan, polisia konsege kaptura membru KORK na’in 23, inklui Xefe Suku ida husi Munisipiu Aileu ho inisial JGJP. Polisia mós kaptura uma-nain ne’ebé oferese fatin ba grupu ne’e halo juramentu.

Tuir polisia, grupu artemarsiais ne’e aproveita mate-uma iha aldeia Ramelau, Suku Manleu, Postu Administrativu Dom Aleixo, Munisipiu Dili, hodi bele dezvia atensaun públiku.

Komandante PNTL Munisipiu Dili, Superintendente Pedro Belo informa, entre membru KOKR na’in 23 iha mós Sekretariu Jeral (Sekjer) KORK ho inisial GA ne’ebé polisia kaptura iha fatin juramentu.

“Ami kaptura sira iha flagrante de litu (tangkap basah) hamutuk ho evidensia lubuk ida, hanesan fardamentu, mina, tudik, lilin, bua malus, sabuk no lista membru sira ne’ebé mak halo juramentu,” informa Pedro Belo ba jornalista sira iha nia knar fatin edifisiu Komando Polisia Kaikoli, Kuarta (13/02).

Komandante Pedro hatutan, membru hirak ne’ebé tuir juramentu mai husi Munisipiu haat hanesan Dili, Aileu, Ermera no Ainaro.

“Sira konvida Sekjer KORK rasik mak tuun direita hodi fó juramentu ba sira,” dehan Pedro Belo.

Tanba sira halo juramentu iha mate-uma, Komandante ne’e dehan, polisia mós kaptura uma-nain tanba fasilita fatin ba grupu artemarsiais illegal hodi hala’o sira-nia atividade.

“Sira uza mate-uma hodi hala’o atividade juramentu atu dezvia publiku ninia atensaun par labele fó informasaun ba polisia. Maibé atividade illegal hanesan ne’e nunka hetan apoiu,” deklara nia.

Daudauk ne’e, suspeitu 23 detein hela iha sela komando Polisia Kaikoli hodi tuir prosesu investigasaun. Suspeitu sira sei kumpri prizaun oras 72 hafoin aprejenta ba Tribunal Munisipiu Dili hodi submete ba prosesu interogatoriu dahuluk.

Kapturasaun membru artemarsiais ne’e bazeia ba rezolusaun númeru 16/2013 hodi taka arte-marsiais tolu,Persaudaraan Setia Hati Terate (PSHT),Ikatan Kera SaktiTimor Leste (IKS-TL) ho Kmanek Oan Rai Klaran (KORK).