Iha fulan Janeiru liu ba, Polisia Nasionál Timor Leste kaptura Funsionáriu Banco Nacional Ultramarino (BNU) na’in rua ho inisial ED (44) no SLY, no funsionariu Komisaun Omenajen ida ho inisial JC, tanba deskonfia envolve kazu falsifikasaun dokumentu veteranu nian.
Ba kestaun falsifikasaun dokumentu veteranu nian, Prokuradór Jeral Repúblika José da Costa Ximenes hatete katak, MP hahú deskobre ona grupu balun iha instituisaun balun ne’ebé halo falsifikasaun dokumentu husi baze dadus.
“Balun komesa falsifika ema-nia dokumentus iha STAE. Emba balun uluk servisu iha IT nasionál nusa nia bele falsifika ema nia (dokumentu) ida ne’e, ne’ebé balun servisu iha Banku, PJR bele temi Banku tanba prosesu investigasaun la’o hela,” deklara PJR José hafoin enkontru semanál ho Prezidente Repúblika iha Palasiu Prezidensiál Bairu-Pite, Tersa (12/02).
PJR dehan, iha kazu balun sidadaun balun ne’ebé trata dokumentu ba veteranu simu osan la tuir valor ne’ebé loloos nia tenke simu no balun la simu nein doit metan ida. Ezemplu, balun ne’ebé loloos simu rihun $20 simu de’it rihun $7.
“(Osan) restu ne’e grupu sira fahe malu de’it tanba dehan sira mak ajuda halo, trata (dokumentus), no balun to’o la simu sentavus ida,” informa nia.
“Ami sei reforsa (prova), maibé ida ne’e hanesan alerta boot ida, ne’ebé balun ita tenke respeita, rekoñese sira ne’ebé veteranu orijinal, maibé balun ne’ebé sai veteranu loloos ba suporta fali atividade ida ne’e atu falsifika fali dokumentus ka sasan sira ne’e,” nia hatutan.
Tan ne’e, PJR ne’e dehan, MP sei husu mandadu detensaun ba Tribunal atu nune’e polisia bele hala’o sira-nia serbisu hodi kaptura suspeitu sira.
“Ministéiru Públiku (MP) komesa promove atu kaer ema balun iha STAE, BNU, Komisaun Omenajen. Portantu ha’u aproveita okaziaun ida ne’e atu informa ba ita-boot sira (jornalista) katak vitima ka ema balun sente sai vitima ba prosesu ida ne’e bele aprezenta keixa ba Ministéiru Públiku,” dehan nia.
Entretantu, iha 28 Janeiru liu ba, Polisia Nasionál Timor Leste Munisipiu Baukau halo kapturasaun ba Funsionáriu Banco Nacional Ultramarino (BNU) ida ho inisiál ED (44) tanba deskonfia envolve kazu falsifikasaun dokumentu veteranu nian.
Molok ne’e, iha 17 Janeiru polisia kaptura ona funsionáriu na’in rua ho kazu hanesan. Funsionáriu na’in rua ne’e ida inisiál JC (45) nu’udar funsionáriu Komisaun Omenajen no ida seluk serbisu iha BNU ho inisiál SLY (47).
Funsionáriu na’in rua ne’ebé polisia kaptura antes deskonfia komete iha kazu falsifikasaun dokumentu. Sira taka lista pagamentu ba veteranu balun durante tinan lima la hetan direitu. Osan sira ne’e suspeitu na’in rua foti hodi uza ba nesesidade privadu.
Portantu, husi kazu ne’e rasik Tribunál Munisipál Dili aplika medida koasaun ba suspeitu na’in rua ho aprezentasaun periódika semana ida dala ida.
Maibé suspeitu na’in rua ne’e la satisfás tanba kazu ne’e la'ós de’it sira na’in rua mesak mak halo. Sira lakohi simu todan ne’e mesak, entaun suspeitu na’in rua informa ba Polisia katak sei iha tan na’in ida mak halai ona ba Munisípiu Ermera. Nia mós komete hotu iha kazu ne’e.
Tuir ofisial Polisia Nasionál Servisu Investigasaun Kriminál (PNSIK) hateten, depois simu informasaun polisia lansa kedas operasaun iha Ermera hodi buka tuir suspeitu ED.
“Ami husu apoiu ba Komandu Polisia Ermera hodi buka tuir suspeitu no suspeitu kaptura ona. Entaun ami nia ekipa ba foti kedas suspeitu ne’e”, informa nia.
