Ida ne’e mak akontese ba uma-kain JD ho BJ ne’ebé tan de’it númeru foun telephone sira diskuti malu no to’o ikus JD baku nia fen BJ no foti katana hodi ameasa.

Tuir akuzasaun husi Ministériu Públiku (MP), iha 23 Maiu 2016 tuku 6:00 loraik, arguidu ho lezada diskuti malu tanba ema telephone mai iha arguidu nia telemovel no husu arguidu sei klosan ka kaben-nain.

“Lezada dehan ba arguidu “Ó ne’e telephone lorloron de’it”. Arguidu hatan ba lezada dehan Ó lorloron ba faan modo iha merkadu Manleu Ó selingkuh ho mane seluk”,” deklara MP iha Tribunal Distrital Dili, Kuarta (15/03).

Rona ida ne’e, lezada dehan nia ba faan modo atu atende nesesidade uma-laran, la’os atu ba buka mane.

“Rona ida ne’e arguidu nervozu hodi baku lezada, tuku dala rua iha oin, buti lezada nia karok no foti katana atu ta’a lezada,” MP akuza.

Ho faktus ne’e, MP akuza arguidu sai hanesan autór material forma konsumadu ne’ebé prevista iha artigu 145  Kodigu Penal Timor-Leste ho ameasa pena prizaun tinan 3 ka multa.

Hatan ba akuzasaun ne’e, arguidu deklara katak faktus ne’e balun loos no balun sala.

Nia dehan, iha momentu ne’e ema telefoni mai duni maibé salah sambung. Nia mós rezeita tuku no buti lezada nia kakorok, maibé tanba hada’u-malu telephone mak arguidu dudu lezada no nia liman kona iha lezada nia hasan dala ida.

“Baku, ha’u la baku. Problema tanba salah sambung, laiha problema seluk. Ha’u deskonfia nia ba mane seluk ne’e tanba nia dehan ema gosta nia, hakarak namora ho nia, tanba ne’e mak ha’u cemburu,” dehan arguidu.

Iha fatin hanesan, lezada reforsa akuzasaun husi MP katak arguidu baku, tuku no buti duni ninia kakorok.

“Ha’u fa’an modo arguidu sempre dehan ha’u selingkuh,” dehan lezada.

Rona tiha deklarasaun ne’e, Tribunál husu ba MP atu halo alegasaun. Liu husi alegasaun MP husu ba Tribunál atu fó pena prizaun tinan ida suspende ba tinan rua. Enkuantu, Defensór Públiku husu ba Tribunál atu fó pena ne’ebé mak adekuadu tanba arguidu arepende nia sala no iha futuru sei la halo tan.

Tribunál adia julgamentu ne’e ba 29 Marsu 2017 tuku 5:00 loraik hodi rona desizaun final.

Audensia julgamentu ne’e prezide husi Juiz Singular Eugebio Xavier, Ministériu Públiku reprezenta husi Prokuradór Osório de Deus, no arguidu hetan asistensia legal husi Defensór Públiku Humberto da Silva.