Tribunal Distrital Dili (TDD) fó razaun katak julgamentu ne’e kontinua la’o tanba TDD notifika arguidu maibé arguidu la mai nafatin.
Tuir kronolojia ne’ebé Ministériu Públiku lee sai iha ninia akuzasaun katak, iha 16 Novembru 2009, tuku 9:00, iha area edidisiu Ministériu Edukasaun, Vila Verde, testamuña Amaru Mangalhaes Barros, kontatu ba lezadu iha edifisiu laran katak, arguidu JE sobu hela motor iha fatin estasionadu.
Lezadu haree husi janela no hetan JE sobu hela motor referidu ho marka Honda mega pro, ho matrikula 3410 G, ho valor $1.800.
Lezadu no testamuña husik de’it no ba hein arguidu iha portaun. Hafoin konsege sobu, arguidu foti ema seluk nia kapaseti no sa’e motor, bainhira to’o iha portaun, lezadu no testamuña kaer motor no baku fila motor halo arguidu monu ba rai, hafoin lezadu kaer kedas arguidu no telefone ba PNTL hodi ba iha fatin akontesimentu no entrega arguidu diretamente ba polisia.
MP akuza, konsekunsia husi arguidu nia hahalok fó prezuiju ba lezadu ho osan total $2.454
Tanba ne’e, MP arguidu sai hanesan autór material ba krime ne’e ho livre deliberida no konsientemente, aproveita situasaun ne’ebé adekuadu atu realiza asaun kriminozu ne’e.
MP dehan, arguidu hatene katak hahalok ne’e, lei kriminal bandu no hatene katak sei hetan kastigu tuir lei kriminal. Arguidu hanesan autór material ho forma konsumadu ba krime furtu agravadu ne’ebé konsagra iha artigu 252 kodigu penal.
Lezadu liu husi ninia deklarasaun hatete, nia para motor maibé la xave volanti.
“Ha’u para motor ne’e ha’u la xave nia volante. Xave ha’u la rai iha motor, ha’u lori hotu ba iha edifisiu laran, maibé arguidu sobu tiha motór nia kontak, halo ligsaun illegal,” dehan lezadu iha TDD, Kinta (16/03).
Rona tiha deklarasaun ne’e, Tribunál husu ba MP atu submete kedas ba iha alegasaun. Liu husi alegasaun MP mantein nafatin akuzasaun, tanba arguidu mós la marka prezensa iha tribunal dezde inisiu. Dezde akontesimentu ne’e, arguidu buka la hetan, tanba ne’e MP husu Tribunál atu aplika pena prizaun tinan 6.
Entretantu defeza informa ba Tribunál katak, tuir inforsmasaun arguidu halai lakon no iha informasaun balun mós ne’ebé dehan arguidu mate tiha ona, tanba ne’e Defeza hato’o ba Tribunál atu aplika pena ne’ebé adekuadu no justu.
Rona deklarasaun ne’e, Tribunál adia julgamentu ba loron 30 Marsu tuku 11:45 hodi rona desizaun final.
Audensia julgamentu ne’e prezide husi Juiz Koletivu, Ministériu Públiku reprezenta husi Prokuradór Renato Bere Nahak, no arguidu hetan asistensia legal husi Defensora Públiku, Laura Valente Lay.
