Deklarasaun ne’e arguidu AB fó sai hodi defende an husi akuzasaun Ministériu Públiku (MP) liu husi audensia julgamentu iha Tribunal Distrital Dili, Kuarta (15/03).

Maibé tuir akuzasaun husi MP, arguidu AB hakbesik an ba lezada, rasta lezada husi kadeira no kaer metin nia liman hafoin dudu lezada to’o monu. Arguidu mós hasai lia-fuan borboleta kalan ba VS.

MP lee sai nia kronolojia katak, iha 1 Abril 2016, iha festa prenda ida besik arguidu ho lezada nia uma iha Fomentu, iha tuku 2:00 madrugada, lezada ninia kolega ida  kumprimenta lezada, no arguidu haree ho oin boot.

Tuir mai, MP dehan, arguidu hakat besik ba lezada hodi rasta lezada husi kadeira no kaer metin lezada nia liman no dudu lezada, nune’e lezada monu ba rai.

“Arguidu mós hatete ba lezada dehan “Ó borboleta kalan ne’e nusa. Tan ne’e lezada mós sente moe (tanba hasai lia-fuan ne’e) iha ema barak nia oin. (lezada) hatan fali ba arguidu dehan “ha’u borboleta, borboleta ba Ó”,” deklara MP.

Hafoin akontesimentu ne’e, arguidu ho lezada fila ba uma. Maibé tuir dalan arguidu kontinua tarata lezada ho maldade to’o uma.

MP kontinua nia akuzasaun katak, bainhira to’o uma, lezada ne’ebé sente moe hasai sapatu sorin hodi tuda ba arguidu maibé la konsege kona no kona fali ba kareta nia vidru kotuk.

Haree ba vidru kareta hetan sinal kiik, arguidu nervozu hodi dada lezada nia fuuk no ros ba sumenti, hafoin tuku dala ida iha lezada nia liman loos no tuku dala ida iha lezada nia kotuk laran. Arguidu kontinua lees lezada nia vestidu hafoin riba lezada ba rai, nunee halo lezada hetan kanek iha nia ain tuur.

Hare ba situsaun ne’e, lezada nia inan hakat besik atu ba sori, maibé arguidu rasta  lezada nia inan nia liman, nune’e lezada nia inan liman mós hetan sinal mean.

Iha altura ne’e, MP hatutan, arguidu mós lees nia kamiza no hatete ba lezada nia inan no hasai lia-fuan ameasa. Arguidu mós hasai lia-fuan ameasa ba lezada nia aman bainhira to’o iha fatin akontesimentu.

MP deklara, kauza husi arguidu ninia hahalok ne’e halo lezada sofre moras iha nia isin lolon durante semana.

Iha julgamentu ne’e, MP deklara sai mós faktus balun ne’ebé akontese durante AB ho VS sai nudar fen ho laen.

Tuir MP, durante moris hamutuk AB sempre baku, tuku, tebe no hasai lian fuan hasoru lezada maibe lezada la ba hato’o keixa.

MP akuza, iha tinan 2014, arguidu tiru kilat dala 7 ba leten hodi ameasa lezada tamba lezada hakarak atu husik arguidu, ho razaun arguidu baku bebeik nia.

Iha 16 Janeiru 2016, arguidu ba iha lezada nia serbisu fatin hodi baku no tebe lezada nia kelen dala tolu, rakut no soe lezada ba iha CPU komputador.

Ho kazu hirak ne’e, MP akuza arguidu sai hanesan autór material forma konsumadu ne’ebé prevista iha artigu 145  Kodigu Penal Timor-Leste ho ameasa pena prizaun tinan 3 ka multa.

Hatan ba akuzasaun ne’e, arguidu deklara katak faktus ne’e balun loos no balun sala.

Iha altura ne’eba, arguidu dehan, sira hetan konvite atu ba partisipa iha festa no lezada ba uluk tanba nia sei hala’o serbisu.

“To’o iha festa ne’e tuku 1:00 madrugada ona, ha’u fó hatene ba lezada dehan ita fila, toba, maibé lezada lakohi, tanba ne’e mak ha’u foti aqua hodi tuda ba rai,” dehan arguidu.

Arguidu deklara tan katak nia nunka hasai lia-fuan borboleta kalan hasoru lezada.

“Nia monu ba rai ne’e tanba ha’u salva an mak dudu lezada hodi monu tun ba rai. Ha’u la lees lezada nia vestidu, la dudu avó feto no la ameasa banin mane no feto,” dehan AB.

Rona tiha deklarasaun husi arguidu, Tribunál adia julgamentu ba 28 Marsu 2017 tuku 14.30 hodi rona deklarasaun husi lezada no testamuña.

Audensia julgamentu ne’e prezide husi Juiz Koletivu, MP reprezentate husi Prokuradór Osório de Deus, no arguidu hetan asistensia legal husi Defensór Públiku Estaquio Guterres.