Maski nune’e, Komandu Munisípiu Bobonaru seidauk bele fo sai informasaun tanba sei hein prosesu investigasaun konjuntu husi komandu rua ne’e.

Komandante PNTL Munisípiu Maliana, Superintendente Asistente Armindo Monteiro hateten, kazu ne’e komandu munisípiu entrega ba Polisia Militár no ekipa PNTL husi nasionál atu hala’o investigasaun.

“Ita akompaña lai komandu rua ne’e halo investigasaun hotu lai mak ami foin informa ba públiku”, dehan nia, via telefone, horisehik.

Nia informa, daudaun ne’e parte PNTL bolu ona komisaun organizadór HEINEKEN atu husu informasaun kona-ba kazu akontesimentu.

Hataan ba Kilat tarutu, nia dehan, ne’e la’ós tiru malu, maibé estratéjia atu hafahe grupu rua tanba kuandu tiru malu ne’e ida tenke sai vítima ka mate.

Nia informa, kona-ba karreta PNTL ne’ebé rahun sei iha hela prosesu investigasaun.

Antes ne’e kazu hanesan mós akontese iha Munisípiu Bobonaru, Postu Administrativu Maliana, ne’ebé pesoál membru Batallaun Orden Publika (BOP) husi Kompañia C baku membru FALINTIL-Forsa Defeza Timor-Leste, iha Maiu 2016.

Iha momentu ne’ebá komandu hatún kedas ekipa konjuntu ida hodi halo investigasaun kona-ba insidente ne’e.

Iha fulan Agostu 2016, membru BOP husi Kompañia C Maliana komete kazu hanesan hodi halo violasaun hasoru membru F-FDTL.

Nune’e, komandu dezde hodi halo suspensaun ba membru na’in 14 ne’ebé deskonfia envolve iha kazu baku membru F-FDTL ne’e.

Iha Outubru 2017, membru Polisia ida baku membru F-FDTL, iha Manleuana-Dili.