Iha 28 Jullu 2018 iha area estrada públiku Prasa Proklamasaun, labarik na’in haat ho idade entre tinan 10 to’o 13 kaer fiska hodi ‘kasa’ manulin.

Haree ba aktu ne’e, polisia hamutuk ho seguransa sivil koko atu hapara no bolu labarik sira ne’e, maibé labarik ne’ebé tauk halai.

Komandante Daruak PNTL Munisipiu Dili, Superintendente Asistente polisia Euclidis Belo hatete, kamera CCTV kaptura ona atividade labarik na’in haat iha estrada públiku prasa proklamasaun nian.

“Sira tiru hela manulin ne’ebé tuur hela iha lampu leten. Ha’u ho seguransa sivil sira tuun ba bolu, maibé sira halai kedas,” informa Euclidis iha komando polisia, Kaikoli, Kuarta (01/08).

Hafoin labarik sira halai, Euclidis hatutan, nia husu ba ekipa monitoring atu kontinua buka paradeiru labarik na’in 4.

Maske hetan ona xamada, maibé labarik na’in haat ne’e kontinua tiru iha area Largo Lecidere. Hafoin kamera CCTV deteta, ekipa polisia no seguransa sivil tuun ba hodi serku no konsege hada’u fiska ne’ebé labarik sira kaer.

Komandante ne’e hatutan, polisia serku no hada’u fiska husi labarik sira ne’e maibé la halo kapturasaun tanba sira ho idade kiik.

“Ami halo de’it briefing ba sira iha fatin akontesementu depois haruka sira fila ba uma,” dehan nia.

Iha oportunidade ne’e, Euclidis husu ba inan-aman sira atu kontrola sira-nia oan atu labele uza fiska tiru tun-sa’e iha dalan publiku.