Kazu ne’e akontese iha Kapela Bidau Mota Klaran, ne’ebé membru CSP ida ho kondisaun lanu todan ba ameasa sarani sira ne’ebé partisipa hela selebrasaun misa.

Membru Komisaun B Parlamentu Nasionál, David Dias Ximenes ‘Mandati’ hatete, oknum pesoál CSP ida foin ameasa pistola ba sarani sira ne’ebé tuir misa tanba problema feto.

“Oknum CSP ne’e tuir informasaun nia-lori pistola mai ameasa ema iha Igreja laran no tolok tan iha fatin sagradu ne’e”, dehan nia, iha Uma Fukun PN, horisehik.

Mandati hatete, timoroan maioria relijiaun Katólika, tanba ne’e sarani sira konsidera Igreja ka Kapela fatin sagradu hodi hala’o orasaun, ne’e duni, tenke respeitu.

Polisia ne’e hala’o orden públiku hodi asegura povu iha situasaun saida de’it, tanba ne’e sira labele uza fali sasán Estadu nian hodi ba ameasa fali ema tanba de’it problema partikulár.

Tanba ne’e, husu ba Komandu PNTL atu loke investigasaun ba pesoál CSP ne’ebé uza patrosíniu Estadu nian la tuir orientasaun komandu nian.

Entretantu, Komandu PNTL identifika ona kazu ameasa ema ho pistola iha misa laran ne’e komete husi membru CSP ho diviza ajente ida. Nune’e, fotin ona desizaun hodi dezarma no lori ba prosesu investigasaun.

“Ohin ha’u haruka bolu ona ajente ne’e mai no ha’u halo ona despaxu ba Departamentu Justisa PNTL nian hodi dezarma para halo prosesu investigasaun”, dehan Komandante Jerál PNTL, Komisáriu Júlio da Costa Hornai, iha servisu fatin, Kaikoli-Dili, horisehik.

Tuir informasaun, membru PNTL ne’e lanu todan tama Kapela laran hapara selebrasaun Eukaristia ne'ebé la'o namanas hela, iha kapela Bidau Mota Klaran, Domingu (5/8).

Tanba ne’e, komandante haruka kedas ekipa ida tun ba buka maibé nia halai. Ne’e duni, ohin segunda nia mai komandu foti kedas medida hodi dezarma ninia arma hodi halo prosesu investigasaun.

“Ita lalika halimar demais ho azneiras no po***ria ne'ebé membru ne’e halo iha Igreja laran”, tenik nia.