Segundu Komandante PNTL Munisípiu Dili, Superintendente Asistente Euclides Belo hateten, polisia kontinua promove kazu ne’e hodi investiga suspeitu ho vítima ne’ebé halo asaun fízika ba malu, iha manu futu fatin.
Nia dehan, vítima ne’e rasik hetan pankada makaas bainhira suspeitu lubuk ida. Oras ne’e vítima halo hela tratamentu saúde iha HNGV Dili.
Vítima rasik hetan sofre husi parte isin lolon ho ulun fatuk, tanba asaun ne’ebé suspeitu sira halo ne’e forte tebes hasoru vítima.
“Ami kontinua halo promosaun ba kazu ne’e, tanba kazu ne’e rasik ami konsidera krime”, dehan Euclides Komandu PNTL Munisípiu Dili, Segunda (17/4).
Nia esplika, vítima ne’e hetan baku tanba haksesuk malu ho suspeitu lubuk ida sobre jogu manu futu nian.
Euclides Dehan, oras ne’e daudaun Kazu ne’e rasik Polisia sei promove ba Ministériu Públiku hodi prosesa tuir lei ne’ebé maka iha.
Dili Kontroladu
Entretantu relasiona ho semana Santa Páskua nian, Polisia Nasionál Timor Leste (PNTL) liu husi Komandu Munisípiu Dili durante ne’e observa iha kapitál hodi kontrola situasaun.
Nia dehan, seguransa ne’e rasik la'o normál laiha insidente no konfrontasaun ne’ebé akontese iha Dili laran.
“Iha festa Páskua situasaun la’o di'ak tebes ne’ebé PNTL koopera ho parte Igreja hodi apoiu seguransa iha loron Páskua nian”, dehan Euclides.
Antes tama ba loron boot ne’e, Komandu Munisípiu Dili alerta ba Komandante eskuadra hotu atu apoiu seguransa ba festa Páskua la'o normál no laiha pertubasaun ruma.
Iha Biban ne’e, komandante husu ba sidadaun hotu tenke kontribui nafatin informasaun atu labele kria konfrontasaun iha Dili laran hodi hamosu konflitu.
