Tuir informasaun ne’ebé jornalista jornal INDEPENDENTE asesu iha terenu, kazu tuda-malu mosu entre militante partidu Fretilin ho militante partidu Khunto.

Maizumenus iha tuku 2 loraik, bainhira militante partidu Khunto hala’o mini kampaña iha Baukau Villa, militante husi partidu Fretilin hahú tuda.

Ho provokasaun husi militante partidu Fretilin ne’e, militante sira husi partidu Khunto mós hahú halo reasaun no ikus mai tuda-malu entre militantes no apoiantes kandidatu Berta ho Lú Olo mós labele atu hasees.

Tuir video no imajen balun ne’ebé fahe iha media sosial hatudu, militantes partidu Khunto tuda rahun komunidade balun nia uma no loza iha area Tirilolo, Baukau Villa.

Vitima sira ne’ebé nia uma no loza rahun ezije ba kandidatu PR Armanda Berta atu hatudu ninia responsabilidade.

Entretantu, ba kazu tuda-malu, militante Khunto ne’ebé sai vitima, Avelito J. Filipe hatete, nia ho nia maluk sira husi Kelikai no Laga mai iha Baukau Villa hodi partisipa iha kampaña kandidatu PR Armanda Berta.

Maibé, to’o iha rotunda Kota Lama, besik Igreja Katedral, ema sira ne’ebé uza atributu Fretilin hahú tuda sira.

"Ema sira tuda ami ne’e barak mak hatais faru Fretelin, sira tuda mai ha'u tuur iha bus leten ha'u la haree ida derepente de’it fatuk kona ha'u-nia ulun ona," dehan vitima iha kampu futebool Triloka, Baukau, Domingu ( 06/03 ).

Avelito dehan, nia ho nia kolega sira mai iha Baukau la’os ho intensaun atu provoka militante ka apoainte partidu seluk, maibé sira mai atu partisipa iha mini kampaña.

Iha akontesimentu ne’e, militante Khunto na’in tolu mak hetan kanek no hala’o tratamentu iha fatin kampaña.

Hafoin kampaña remata, militante Khunto ne’ebé fila ba Laga hetan mós asaltu, maibé la konsege rezulta kanek.

Enkuantu, militante Khunto ne’ebé ba Venilale hetan tuda husi grupu dezkoñesidu ne’ebé rezulta na’in lima kanek.

Vitima husi kazu ne’e, Alianca Freitas Monteiro hatete, sira viazen atu fila ba sira-nia uma iha Venilale maibé iha dalan grupu dezkoñesidu subar iha foho leten hodi tuda sira.

"Ami sai husi Fatumaka nian sai mai to'o Kaudadi nian mak ema sira ne'e subar hotu iha foho leten mak tuda tuun mai, balun husi sorsorin, polisia sira akompaña ami ne'e tiru mak foin sira halai tama ba ai-laran," dehan nia.

Vitima na’in lima, feto na’in tolu no mane na’in rua, daudaun ne'e hetan ona tratamentu iha sentru saude Venilale.

Entretantu, Jornalista INDEPENDENTE tenta halo konfirmasaun ba PNTL Munisipiu Baukau maibé la atende telefone.