Advogadu Francisco Kalbuadi Lay, José Pedro Camões deklara, ninia kliente deskonfia komete krime rua iha tinan 2014 no 2018 ho tipu kazu ne’ebé diferente.

Nia dehan, tuir notifikasaun husi Prokuradór ba Kalbuadi dehan komete krime partisipasaun ekonómiku ho brankamentu kapitais.

“Detalla prosesu ne’e sei iha segredu justisa nia laran. Signifika, kualkér faktu sira ne’ebé iha inkéritu laran to’o agora Ministériu Públiku seidauk notifika nia (Kalbuadi) no mós ha’u seidauk akompaña nia ba prokuradór até agora”, dehan Camõeos, iha Tribunál Munisipál Dili (TMD), horisehik.

Tanba ne’e, nia dehan, kazu rua ne’e seidauk ba presta deklarasaun iha Ministériu Públiku hodi hatene liután faktu, tanba ne’e bele dehan segredu justisa.

Tanba ne’e, Kalbuadi sei hanesan sidadaun komun, livre hela, ba ne’ebé no goza direitu tomak, maibé atualmente Kalbuadi iha ona Dili. Nia fila mai iha Domingu (10/3) no hahú asume funsaun hanesan deputadu.

Tuir informasaun ne’ebé diáriu ne’e rekolla kona-ba kazu rua mak hanesan brakeamentu kapitais katak arguidu halo transferensia osan no nominál boot ba nasaun estranjeiru balun.

Nune’e, iha kazu kona-ba partisipasaun ekonomia deskonfia Kalbuadi fó projetu ba kompañia balun ne'ebé deskonfia iha relasaun família ho Kalbuadi hodi halo konstrusaun Jardín Lifau, liu husi prosesu adjudikasaun direta.