Antes hahú julgamentu Tribunál husu ba lezadu atu halo tentativa rekonsiliasaun tanba krime ne’e natureza públiku, maibé lezadu Jerónimo lakohi atu dada fali keixa ne’e no hakarak atu kontinua to’o iha desizaun finál.

Tuir akuzasaun husi ministériu públiku ne’ebé Tribunál lee sai, iha loron 25 Jullu 2016, maizumenus tuku 11:45 Otl, iha Kolmera-Dili, lezadu Jerónimo Amaral da Silva hanesan jornalista hamutuk ho nia kolega Frederico Guterres hamriik hodi hasai fotografia arguidu ne’ebé halo servisu tránzitu tanba mosu engarrafamentu.

Entretantu, arguidu JT hamutuk ho nia kolega sira simu orden husi komandu normaliza rodaviaria, tanba mosu engarrafamentu iha Dili laran. Bainhira simu orden, arguidu hamutuk ho nia kolega sira komesa observa husi Audian, Parlamentu Nasionál, Banku Mandiri no ikus liu iha Kolmera.

Bainhira halo patrullamentu to’o iha Kolmera, arguidu haree karreta tanki mina ne’ebé para dobradu, tanba ne’e nia nia tun husi karreta ba buka kondutór hodi fó hatene atu para fali iha fatin seluk, maibé la hetan.

Lezadu haree arguidu manda hela karreta iha área Kolmera, tanba ne’e nia hasai fotografia. Tanba hasai fotografia ne’e arguidu husu ba husu lezadu hodi dehan “tanba saida mak o hasai ha’u nia foto la iha autorizasaun”, maibé lezadu hataan “ha’u jornalista”.

Maibé arguidu kontinua husu ba lezadu hodi dehan “Bainhira hasai ema nia foto tenke iha autorizasaun husi ha’u”, maibé lezadu mantein nafatin hodi dehan “ha’u jornalista”, tanba ne’e arguidu lori liman basa dala ida iha lezada nia hasan.

Arguidu ho lezadu komesa diskute malu hodi ema barak ba hobur, tanba ne’e membru polisia sira seluk mai kaer lezadu ho arguidu hodi sa'e ba karreta ba rezolve iha komandu eskuadra Distritu Dili iha Kaikoli.

Konsekuénsia husi agresaun ne’e lezadu nia hasan moras no moe tanba baku nia iha fatin públiku.

Tanba ne’e, Ministériu Públiku akuza arguidu ba krime ofensa integridade fíziku simples konjuga ho violénsia doméstika ne’ebé previstu iha artigu 145 kódigu penál Timor-Leste nian.

Hataan ba akuzasaun arguidu JT deklara ba Tribunál katak, iha faktu ne’e balu loos balu sala.

Nia dehan, momentu karik membru polisia ne’e hatene lezadu ne’e jornalista karik arguidu ne’e la baku.

“Iha momentu lezadu hasai foto ne’e ha’u husu duni nia, Ó hasai foto ne’e Ó hetan autorizasaun husi sé? Tanba lezadu hasai foto ne’e ho kondisaun subar, tanba ne’e ha’u hakat hodi husu nia, maibé iha momentu ne’e lezadu mós hasai lia mal mai ha’u katak ha’u hasai Ó nia foto la di'ak ka? Tanba ne’e ha’u basa nia hasan dala ida, maibé la'ós ho intensaun atu baku nia sei karik ha’u ho intensaun baku ne’e ha’u uza forsa lezadu hakdasak kedas iha rai”, dehan arguidu JT ba Tribunál.

Arguidu ne’e dehan, iha momentu ne’e lezadu la hatudu nia kartaun identidade to’o iha komando nia oin mak lezadu foin hasai nia kartaun identidade ne’e.

Iha fatin hanesan, lezadu informa ba Tribunál katak, iha loron 25 Juñu akontesimentu ne’e, iha momentu ne’e lezadu hasai foto duni tanba polisia tránzitu halo pasa revista ba karreta ne’ebé para dobradu, tanba iha momentu karreta sira mós sira la kompriende sinais tránzitu.

“Ha’u sai foto atu halo notísia, sei karik mak la akontese entaun ha’u entrevista sira hodi nune’e bele halo notísia. Iha momentu nia baku ha’u ne’e, nia hakat husi estrada sorin nia mai basa dala ida iha hasan mak foin husu dehan Ó hetan autorizasaun husi sé mak Ó hasai fotografia ne’e, maibé ha’u dehan ha’u jornalista ne’ebé iha fatin públiku ha’u livre atu sai foto”, dehan lezadu ba Tribunál.

Nia dehan, iha momentu ne’e arguidu sira lori lezadu ba kantor polisia atu rezolve problema ne’e, maibé lezadu dehan ba arguidu sira dehan nia la’ós kriminozu para hodi nia ba kantor polisia.

Tribunál rona tiha deklarasaun husi parte rua ne’e tribunál deside hodi adia julgamentu ne’e ba fali loron 20 Juñu 2017 hodi kontinua rona testemuña.

Audiénsia julgamentu ne’e prezide husi juis singulár, Maria Solana, Ministériu Públiku reprezenta husi Prokuradór Reinato Bere Nahac, arguidu hetan asisténsia legál husi defensór públiku, Marçal Mascarenhas.