Nia dehan, karta husi lezadu bele fó impresaun aat husi públiku katak tribunál foti desizaun tanba hetan karta husi lezadu.

Ne’e duni, juis Ivan iha ninia deklarasaun dehanm juis sira sei la foti desizaun ruma ba arguidu sira tanba simu karta husi lezadu ida.

“Lezadu Rui Maria de Araújo labele haruka karta ba tribunál, tanba públiku bele hanoin katak tribunál foti desizaun tanba hetan karta husi lezadu”, dehan nia bainhira dirije desizaun kazu difamasaun entre Timor Post ho Rui Maria de Araújo, iha TDD, horisehik.

Hafoin ida ne’e, juis mós husu ba prokuradora Lídia Soares iha sala audiénsia karik simu mós karta ida ne’e, maibé prokuradora ne’e doko ulun de’it (ho signifikadu la simu karta ruma husi lezadu).

Entretantu, iha ninia desizaun, juis Ivan absolve arguidu Raimundus Oki no Lourenço Martins tanba la prova ba kazu denunsia kalunioza, ne’ebé prevista iha artigu 285 Kódigu Penál (KP).

Iha sentensa juis dehan, arguidu sira laiha konxiénsia atu lori lezadu ba prosedimentu kriminál, tanba arguidu sira halo ona korresaun no husu ona deskulpa ba erru hakerek sala naran ne’ebé mosu iha notísia nia laran.

Liu husi ninia leitura juis ne’e hateten, publikasaun jornál Timor Post nian prova ba prejudika bom nome no reputasaun lezadu nian, maibé arguidu sira halo publikasaun la ho intensaun atu lori lezadu ba prosedimentu kriminál hanesan deskreve iha artigu kona-ba denunsia kalunioza nian.

Hafoin juis lee sai desizaun, ministériu públiku iha hanoin atu halo rekursu ba kazu ida ne’e, maibé sei hein folla sentensa eskritamente husi Tribunál Distritál Dili.

Julgamentu leitura sentensa ne’e prezide husi juis singulár, Ivan Patrocínio Antonino 'Suritay', Ministériu Públiku reprezenta husi prokuradora Lídia Soares no prokuradór Jacinto Babo, arguidu Lourenço Martins no Raimundus Oki hetan asisténsia legál husi advogadu privadu José Pedro Camões no Arlindo Sanches.

Aleinde ne’e, hetan mós partisipasaun másimu husi komunidade média nasionál no internasionál, inklui asosiasaun husi rai li'ur no rai laran.