Povu husu atu Ministériu Komérsiu Indústria Ambiente (MKIA) atu haree problema ida ne’e, tanba bele hamosu problema negosiante Timoroan no negosiante la’o rai hosi Xina.

Negosiante Timoroan sira iha ne’ebá lamenta, tanba atividade fa’an sasán nesesidade báziku ne’ebé loloos Timoroan bele halo, agora domina hosi negosiante Xineza.

“Xineza sira ne’e labele mai halo negósiu iha ami nia fatin, se sira mai, ha’u rasik mak sei oho xineza sira ne’e,” dehan Reprezentante komunidade Afonso Soares Maia durante diálogu ho Prezidente, Taur Matan Ruak  iha Suku Tebabui, horisehik.

Responde ba preokupasaun, PR Taur dehan problema ne’e komplikadu ituan, tanba estadu mak fasilita negosiante Xineza sira ne’e mai, depois la halo kontrola ho di’ak.

Kona-ba ameasa atu ‘oho’, Taur husu negosiante Timoroan labele halo krime, tanba se mak oho ema, polisia sei kaer.

“Maun (Afonso) dehan oho sira, polisia kaer ita, ita buka dalan atu rezolve. Tanba ita nia alin sira mak ita serbisu hamutuk,” dehan PR Taur.

Taur dehan, realidade ohin loron hatudu katak, Timoroan barak fa’an rai ba Xineza hodi sosa loke loza hosi ki'ik too boot.

“Ha’u hanoin ida ne’e, labele fó sala ba ema, tanba ita mak fa’an rai baratu ba ema Xineza sira depois osan ne’e hotu ita mak halai sa’e fali ba foho leten,” dehan Xefe Estadu.

Nu’udar Prezidente Repúblika, Taur mós preokupa kona-ba problema ne’e, tanba too agora governu ‘fraku’ atu halo kontrola.

Taur husu atu negosiante Timoroan sira labele lakon esperansa, sira tenke fiar aan atu kompete ho ema seluk, hodi hatudu katak, Timor mós bele.