Problema hari rin eletrisidade uza au, tanba komunidade lamenta promesa governu atu harii rin eletrisidade ho besi ba sira nia suku too agora seidauk realize.

Deputada ne’e dehan, konstrusaun hari rin eletrisidade iha suku Loi-Lubu dok husi hela fatin komunidade sira nian tanba ne’e komunidade ho inisiativa rasik hodi dada fiu eletrisidade mai sira nia fatin.

Maiske komunidade rasik mak esforsu aan hodi dada ahi mai sira nia hela fatin maibé ohin loron parte EDTL Munisipiu Baukau kontinua monta prepagu iha sira nia fatin hodi obriga komunidade tenke sosa toge atu bele asesu ba naroman husi enerjia eletrika.

Tanba ne’e deputada ne’e husu ba ministeriu relevante atu haree ba kestaun ne’e hodi resolve ho imediatamente tanba ohin loron tempu udan ona se ho kundisaun nune’e bele fó ameasa ba komunidade sira nia vida.

Responde ba preokupasaun ne’e, Vise Ministru Obras Públika Eletrisidade no Servisu Água no Saneamentu, Januario Pereira hateten, EDTL ohin loron esforsu aan atu dada eletrisidade ba komunidade atu bele asesu 24 oras.

Maibe,  Janiario dehan, komunidade sira ne’ebé hela dook husi estrada tenke hakbesik aan ba estrada atu nune’e fasil asesu ba dezenvolvimentu ne’ebé estadu planeia atu halo.

Tuir nia, dezenvolvimentu eletrisidade iha Timor-Leste iha progresu boot kompara ho tinan hira ba kotuk tanba ohin loron Povu kuaze maioria mak asesu ona ba enerjia eletrisidade.

Maiske iha progresu maibé governu liu husi EDTL kontinua esforsu aan nafatin hodi hadia failansu sira ne’ebé durante ne’e akontese iha terenu.

EDTL Tama Kobra Reseita Tokon $28

Entretantu iha parte seluk, Vice Ministru, Januario deha, durante Janeiru too Dezembru 2016, Eletrisidade nasional Timor-leste EDT konsege kobra reseita eletrisdade tokon $28 hodi hatama ba kofre estadu.

Osan sira ne’e EDTL rekolla hosi husi token (pulsa eletrisidade) ne’ebé komunidade TL komesa selu.

Nia hatutan, ohin loron EDTL tau ona osan tokon $1 atu sosa prepagu (kontador) atu nune’e iha tinan ne’e uma kain sira ne’ebé dada ona eletrisidade bele monta hotu ona kontador iha kada uma kain sira para bele fó reseitas mai kofre estadu.

“Ami nia tarjetu iha tinan ne’e EDTL bele rekolha reseitas tokon $30 to’o $40 iha tinan ida nia laran,” dehan Januari iha PN Kinta (05/01).

Nia hatutan, komunidade balun iha munisipiu sei dada ahi ilegál tanba ho razaun katak, komunidade balun sedauk monta prepagu tanba ne’e sira hatudu atetudi hanesan ne’e, maibé EDTL sei nafatin esforsu aan hodi kontrola atu nune’e ba future labele akontese tan.