Tuir negosiante sira ne’e katak, sira seidauk prontu atu sai, tanba governu rasik seidauk prepara fatin di’ak ruma ba sira.

Negosiante sira deklara katak, sira prontu nafatin atu koopera ho governu hodi selu taxa ba estadu tuir negosiante idak-idak nia rezultadu rendimentu negósiu.

“Ami husu ba governu muda ami ba fatin seluk, di’ak liu hadi'a fila fali fatin ne’e. Selae ami koopera para fulan -fulan ami selu taxa ba estadu ne’e ami prontu,”dehan Koordenadór Negosiante, Domingos dos Santos ba INDEPENDENTE iha Tais Market Kolmera, horisehik.

Nia dehan, durante ne’e sira rona ona aviza hosi Prezidente Munisipiu Dili deklara iha media no sira prontu koopera bainhira koordena ho sira para buka fatin di’ak.

Maiske Administrasaun Munisípiu Dili fó sai ona katak, sei muda fatin tais market ba fali iha parte Audian nian, maibé negosiante seidauk prontu, tanba turista sira vizita loro-loron hodi sosa sira nia tais.

Tuir nia katak, too agora sira nia parte hein hela ekipa Munisípiu Dili atu hala’o sosializasaun informasaun ba sira, molok muda sai.

Governu Tenke Harii Sentru Kultura

Entretantu, Domingos sente preokupa ituan, loloos ne’e governu tenke kria sentru kultura di’ak ruma ba sira.

Tuir nia katak, Governu Indonézia rasik investe osan hodi hari sira nia edifísiu Kultura iha Kaikoli Dili, maibé governu la hanoin atu kria sentru kultura ruma.

“Nu’udar povu ami sente preokupa itaun, tanba Indonézia mai harii ninia sentru kultura iha ita nia rain, maibé ita nia sentru kultura rasik la iha ne’e oinsá,” nia preokupa.

Entretantu tuir observasaun INDEPENDENTE nota katak, kuaze turista lokál no internasionál vizita ba sentru ne’e hodi sosa sasán.