“Ai fuan, sira ne’ebé sira fa'an labarik ki'ikoan tau iha plástiku, ita boot sira (jornalista) haree, ai-fuan ne’e fuan 3 sira fa’an ba balun $0,50 sentavus balun ba $1 loos ka lae ? entaun sira fa’an ai-Fuan sira ne’e tanba ai-Fuan sira ne’ebé mak (sira) ba hili iha ne’ebá (Lixu Tibar),”dehan Deputada Benedita Magno b Diáriu INDEPENDENTE iha PN. Segunda (23/01).
Ho fiar aan, Deputada Benedita Magno nia informa kestaun ne’e, tanba nia iha faktus no haree ho matan ai fuan balun ne’ebé liu prazu no dodok ema ba soe iha lixu ho kaixa tomak, maka labarik sira ba hili hodi tau iha plástiku hodi fa’an fila fali
Deputada Bendita dehan, nu’udar reprezentante povu nia ko’alia informasaun ne’e tuir realidade hodi fó atensaun ba públiku atu kuidadu sosa ai fuan sira ne’e, tanba bele fó impaktu ba ema nia saúde.
Bendita sujere di’ak liu atu sosa ai fuan fresku ba diretamente loja ou supermerkadu.
Nia hatutan, informasaun ne’e nia fó sai la’ós atu diskrimina negosiante hotu, maibé atu fó atensaun ba públiku no governu halo kontrolu makas ba problema ne’e.
Deputada ne’e husu atu Ministériu Saúde no MKIA forma ekipa ida halo investigasaun ba problema ne’e.
Bendita hatutan, pior liután maka, dala ruma naan ayam poton, naan fahi, ikan iha lotarias balun liu prazu ema ba soe ho kaixa tomak, povu balun ba hili hodi konsumu.
Negosiante Lamenta
Entretantu iha parte seluk, Negosiante Ai fuan Mariano Soares (13) ne’ebé loron-loron leba ai fuan fresku hanesan, sabraka no masan hodi fa’an konsidera informasaun ne’e bosok.
Nia dehan, ai fuan ne’e, fresku ne’e sira ba sosa iha Supermarket Kmanek hodi tau ba plástiku maka fa’an, la’ós ba hili iha fatin lixu Tibar.
Nia dehan, dala ruma sabraka ki'ik plástiku sira sosa ho presu $3 hasai hodi fa’an fali ho presu $0,50 sentavus too $1.
Parte seluk, Negosiante Júlio Henrique (15), dehan dala ruma ema balun maka ba hili ai fuan iha Tibar hodi fa’an para hafo'er negosiante seluk nia naran.
Nia dehan, durante ne’e sira fa’an de'it sabraka Timor nian ne’ebé sosa iha Remexiu no Laulara.
Nu’udar negosiante, nia husu atu governu bele halo investigasaun ba problema ne’e.
