Domingu, 17 Fevereiru 2019 | Login
Komandante Jerál PNTL, Komisáriu Júlio da Costa Hornai Komandante Jerál PNTL, Komisáriu Júlio da Costa Hornai

PNTL sei Halo Operasaun Kombate GAM Featured

DILI: Komandu Jerál Polisia Nasionál Timor-Leste (PNTL) manda ona karta lisensa operasaun kombate Grupu Arte Marsiál (GAM) ba Governu no Parlamentu Nasionál, tanba konsidera komesa ‘abuza’ estabilidade nasionál.

 

Karta Ke’e haruka ba hafoin instituisaun PNTL identifika membru GAM sira fó ameasa sériu ba estabilidade iha territóriu Timor tomak.

Haruka ona karta ba ministru atu bele halo operasaun ba arte marsiál ne’ebé ita haree ba abuza demais ona, halo konflitu sira ne’e akontese iha fatin-fatin,” dehan Komandante Jerál PNTL, Komisáriu Júlio da Costa Hornai iha Palálsiu Prezidensiál, Bairru-Pité, horisehik.

Nia dehan, konflitu entre arte marsiál ne’ebé akontese iha Timor komesa sa'e ba beibeik. Iha Baukau uma lubuk ida hetan estragu. Likisá mós halo problema. Situasaun ne’e maka sai preokupasaun ema hotu ninian.

Ne’e duni, Júlio dehan, arte marsiál sira halo buat ne’ebé demais, tanba ne’e maka komandu sei halo operasaun ne’ebé hodi kombate aktu sira ne’ebé halo komunidade sente pániku no la hakmatek.

Forsa hanesan aparellu Estadu ninia, tantu defeza no seguransa sei la tolera aktu anarkizmu, tanba ne’e sei hein para depois desizaun husi Governu ninia atu bele halo operasaun.

Identifika Suspeitu Na’in Haat Hana Mestre 77

Komandu PNTL Munisípiu Dili aprezenta ona auto notísia identifikasaun suspeitu na’in haat ne’ebé hana mestre 77 iha Ai-Mutin ba Ministériu Públiku (MP) atu promove ba Tribunál hasai mandadu detensaun.

Segundu Komandante PNTL Munisípiu Dili, Superintendente Asistente Euclides Belo hateten, Polisia Eskuadra Don Aleixo aprezenta ona relatóriu mai Komandu Kaikoli kona-ba paradeiru suspeitu na’in haat nian, maibé sei hein mandadu kapturasaun.

Fasil loos ba ami atu hetan suspeitu sira, tanba sira la tuun husi lalehan no la sa'e husi rai okos, maibé ami seidauk bele publika identidade suspeitu sira nian tanba sei iha hela prosesu nia laran”, tenik nia, iha edifísiu komandu Polisia Kaikoli, horisehik

Tanba ne’e, PNTL servisu hamutuk ho MP para atu lalais hetan notifikasaun husi Tribunál para bele hala’o ninia knaar. Ne'e duni, sedu ka tarde Polisia sei aprezenta suspeitu sira ba prosesu justisa.

Portantu, lezadu Teotónio Machado (48) mestre 77 ne’ebé koñesidu ho naran Teo hela iha Fatuhada agora daudaun alta ona husi Ospitál Nasionál Bidau, maibé kontinua halo tratamentu movel.

Teo hetan hana iha ninia hirus matan ho rama Ambon, inklui taa mós iha ninia liman parte rua, deskonfia envolve husi membru grupu arte marsiál (GAM) Persaudaraan Setia Hati Terate (PSHT) iha Ai-mutin, Sábadu (2/2).

Baukau no Likisá Kaptura Suspeitu Na’in Ualu

Suspeitu na’in rua ne’ebé envolve iha kazu konfrontasaun entre GAM iha Baukau oras ne’e daudauk iha ona prizaun preventiva, maibé Komandu PNTL Munisípiu Baukau kontinua halo nafatin persegisaun ba suspeitu sira seluk ne’ebé sei livre.

Kazu iha Baukau kaptura ona suspeitu na’in rua agora daudaun iha prizaun preventiva, ita persege nafatin, sira seluk ne’ebé envolve iha aktu ida ne’e,” dehan Komandante Jerál PNTL, Komisáriu Júlio da Costa Hornai.

Entretantu, iha Likisá mós hanesan PNTL kaptura na’in rua no na’in haat seluk entrega-aan, tanba ne’e PNTL sei mantein nafatin hodi buka tuir nafatin sira atu bele lori ba prosesu legál.

Nia hatutan, kauza husi problema ne’e entre sira ho sira ataka malu, ne’ebé membru Ikatan Kera Saktui (IKS) baku membru PSHT, nune’e ikus mai sira ataka malu.

Read 335 times Last modified on Segunda, 11 Fevereiru 2019 08:34
Rate this item
(0 votes)