Xefe Estadu Maiór Jenerál FALINTIL-Forsa Defeza Timor Leste (F-FDTL), Majór Jenerál Lere Anan Timur hateten, F-FDTL no PNTL sei koordena hodi tun halo atuasaun uza forsa no sei la atua tuir lei direitu umanu nian.

nia dehan, agora kuaze arte marsiál ativu loos iha Baukau, Likisá, no Dili. Sunu uma, sona malu, duni malu halo populasaun la hakmatek.

“Hein husik sira halo ba, bainhira ita tun, ita tau direitu umanu ne’e sorin, ita defende estabilidade, defende hakmatek ba ita-nia komunidade ninia”, hateten Lere , iha Palasiu Prezidensiál, Bairru-Pité, horisehik.

Tuir nian hatene, arte marsiál agora ativa maka’as tanba foin daudauk sira hasae sintu iha Atambua, ne’ebé fila mai tenke hamanas sira nia biru.

Maibé, Polisia ho F-FDTL mós sei ba hamanas ninia biru ho arte marsiál sira. Labele abuza, Timor ne’e ema barak mate, barak terus ba rai ne’e, labele loron-kalan oho malu, duni malu hanesan ema fuik.

Jenerál fitun rua ne’e fundamentu katak, bainhira membru F-FDTL ka PNTL maka envolve arte marsiál sei hasai no prosesa ba Tribunál tanba envolve iha organizasaun ilegál.

“Ha’u nia oan maka envolve hasai tiha nia no lori kazu ne’e ba Tribunál atu nia responde tanba nia elementu seguransa ninia”, tenik nia.

Sistema Judisiáriu La Apoia

Iha parte seluk Lere lamenta mós desizaun Tribunál nian, ne’ebé dala barak instituisaun seguransa no defeza kaptura ema sira ne’e maibé to’o iha Tribunál dala barak hetan liberdade.

Nia dehan, dala ruma forsa kaer ema ne'ebá ho evidénsia arte marsiál, lori rama Ambon ka arma branka ninia atributu sira, ba husik de’it.

“Se Tribunál ka sé-sé de’it bainhira la ajuda atu mantein estabilidade nasionál, ami mós toma medida atu responde ba situasaun atuál”, dehan nia.

Nia hatutan, evidénsia maka arte marsiál ho arma branka, rama Ambon, samurai la’o iha Dili laran. Dili laran lori rama Ambon ne’e atu halo saida? Rusa laiha, meda laiha, manu laiha, só ema maka iha.

Promesa Kampaña Polítika

Entretantu, nia hateten, tanba uluk kampaña ne’e boot sira ko’alia dehan atu tau matan maibé laiha. Bainhira bolu ninia xefe sira ne’e mai ba halo estatutu organizasaun didi’ak bele ona rezolve problema.

Jenerál fitun rua ne’e hateten, duke sira ba sa'e sintu iha Atambua-Indonézia, nusa maka la halo rasik. Agora ne’e konsidera krime organizadu polísia tun maka ne’e ona, ema diretu umanu mós la ko’alia.

Orienta OPS Identifika Atividade GAM

Komandu Polisia Nasionál Timor-Leste (PNTL) Munisípiu Dili, halo ona orientasaun ba membru sira liu-liu Ofisial Polisiamentu Suku (OPS) atu tama-sai bairru no aldeia hodi monitoriza no identifika atividade ilegál ne’ebé Grupu Arte Marsiál (GAM) sira halo.

Daudaun ne’e konfrontasaun ne’ebé mosu entre proventus sira iha territóriu Timor-Leste, inklui hana no taa malu ninia indikasaun mai husi problema arte marsiál.

Tanba ne’e, Komandante Polisia Munisípiu Dili hahú halo ona enkontru ho ofisial sira hodi husu ba eskuadra sira atu toma responsavel hodi ajuda halo identifikasaun.

Segundu Komandante PNTL Munisípiu Dili, Superintendente Asistente Euclides Belo hateten, OPS ninia knaar atu lalais informa ba komandu kuandu mosu distúrbiu públiku.

“Ita husu ona ba OPS loron ida tenke tama uma kain lima para atu identifika, inklui halo aprosimasaun ho komunidade sira. OPS la'ós atu tuur de'it iha fatin”, tenik nia.

Nia esplika, durante ne’e mosu duni kazu barak iha bairru sira. Tan ne’e, ba oin iha ona polítika ne’ebé komandu trasa maka komandante eskuadra sira atu fihir sarjentu ida atu responsabiliza atividade OPS nian.

Atividade ne’e hahú ona iha Kuarta (6/2) no Sesta (8/2), komandu sei atualiza fali para hatene progresu saida mak OPS sira halo. Ne'e duni, membru Polisia ida tenke iha ninia knaar no hala'o duni.