Komandante UPM Husu Membru Servisu ho Fuan Featured

By Florencio Ximenes Marsu 28, 2019 8029
Komandante  UPM , Superintendente Lino Saldanha  tula deviza  Primeiru Serjentu ba Komandante UMP Postu Atauro, Patricio da Conceição. FOTO; INDEPENDENTE/ Florencio Ximenes. Komandante UPM , Superintendente Lino Saldanha tula deviza Primeiru Serjentu ba Komandante UMP Postu Atauro, Patricio da Conceição. FOTO; INDEPENDENTE/ Florencio Ximenes.

DILI: Komandante Unidade Polisia Maritima (UPM), Superintendente  Lino Saldanha husu ba membru UMP tomak atu kontinua servisu ho fuan, responsabilidade, badinas no intelijénsia ho morál atu hala’o tuir lei no orden hodi asegura povu no rai doben Timor Leste.

Komandante UMP hato’o lia menon ne’e ba membru sira, bainhira iha aniversáriu PNTL ba dala 19,  tinan ne’e no membru UMP na’in 48   hetan promosaun diviza kompostu husi atijidade ajente ba ajente prinsipál na’in 29 no Sarjentu ba primeiru sarjentu hamutuk 19. Tuir loos membru 50, maibé na’in tolu sei hetan iha tinan oin.

PNTL liu husi Komandu deside fó promosaun ba membru hirak ne’e tanba prenxe ona kriteria hanesan dixiplina, komportamentu no servisu kompleta ona tinan neen.

“Ha’u husu imi tenke kontinua servisu ho fuan no laran atu serbí estadu no povu ida ne’e,” dehan nia hafoin promosaun iha Kuartél UPM-Lesidere-Dili,horisehik.

Kona ba difikuldade UPM durante ne’e, nia dehan iha difikuldade barak liuliu ekipamentu  atu fasilita membru sira asegura riku soin iha tasi laran. Tan ne’e nia husu governu presiza fó konsiderasaun.

Aniversáriu PNTL ba dala 19 ne’e, nia dehan orgullu tebes tanba instituisaun PNTL hotu-hotu konsege hatudu kometimentu hodi asegura estabilidade iha rai laran.

Nia orgullu mós iha aniversáriu ba dala 19 ne’e ho komandante Jerál Polisia Nasionál Timor Leste foun Faustino da Costa mós hetan pose.

Nia espera no fiar komandante foun bele kontinua fó kapasitasaun ba membru polisia sira atu sai profisionál, iha ekipamentu ne’ebé di’ak atu fasilita membru sira nia servisu,  membru sira tenke domina lei liu husi estudu no hahú muda ona mentalidade membru sira nia inklui hasa’e saláriu ba membru polisia sira.

‘’Membru hotu tenke kaer prinsípiu kamaradajen atu kumpre de'it komandante , maibé tenke tuir lei, la’ós tuir prinsípiu polítika. No tenke haree povu hanesan la’ós haree ba família de’it,” dehan nia.

Rate this item
(0 votes)
Last modified on Kinta, 28 Marsu 2019 16:38

Independente Digital TV