Tuir dadus husi Psychosocial Recovery and Development in East Timor (Pradet), ema ho moras mental ne’ebé laiha fatin no iha de’it dalan ninin iha Kapital Dili hamutuk na’in 75.
Ofisial Programa Asistensia Moras Mental (PAMM)-Pradet, Richa Nela E. de Oliveira hatete, dadus ne’ebé durante hetan iha terenu identifika númeru boot ema ho problema mental iha dalan ninin sidade Dili.
“Dadus ne’ebé mak ami hetan hamutuk 75 pessoas no balun ami konsege hetan ona sira-nia familia,” informa Richa iha Timor Plaza, Sesta (29/03).
Husi númeru ne’e, Pradet fó ona apoiu ba na’in neen (6) hodi hala’o tratamentu intensivu iha Klinika Bairro-pite.
Hafoin halo tratamentu saúde, nia hatete, balun konsege hatudu progresu no hahú koñese no identifika sira-nia familia no ninia hela fatin.
“Na’in neen mak halo ona tratamentu intensivu, maibé sira seluk to’o ohin kontinua iha estrada ninin,” dehan nia.
Aleinde ne’e, Pradet mós identifika komunidade balun halo agresaun fiziku ba ema ho moras metal. Maske la sita númeru fiksu no kazu agresaun ne’ebé halo, maibé Richa hatete de’it katak kazu agresaun fiziku ne’e barak akontese iha Largo Lecidere.
“Pradet sei kontinua buka meius hodi hatene ema ne’ebé halo agresaun fiziku hasoru ema ho moras mental,” katak nia.
Nia hatutan, Pradet mós sei koopera ho PNTL atu buka tuir kazu refere hodi bele identifika autór ba agresaun fiziku hasoru ema ho problema mental.
PAMM nu’udar programa orijinal husi Pradet ne’ebé estabelese iha tinan 2000 ne’ebé kontinua iha tinan 2002 bainhira Pradet sai ONG nasionál ne’ebé independente no hetan finansiamentu husi CBM (Christian Blind Mission Germany).
Husi tinan 2002 to’o 2015 PAMM serbisu hamutuk governu liu husi programa Saude Mental hodi prepara serbisu psikososial ba ema ho moras mental husi Munisipiu Dili, Ermera, Likisa, Aileu, Manatuto, Ainaro, Baukau no Bobonaro.
Iha 2015, finansiamentu CBM ba serbisu iha Munisipiu paradu no PAMM loke Sentru Pilotu ba Reabilitasaun Psikososial (PRC) iha edifisiu Pradet iha Ospital Nasionál Guido Valadares (HNGV).
