Gil Alves Husik Hela Memoria Furak Featured

By INDEPENDENTE Marsu 19, 2019 11016
Eis Ministru Turizmu, Komersiu  no Industria, Gil Alves  lansa programa "Povu Kuda, Governu Sosa". FOTO: dok Eis Ministru Turizmu, Komersiu no Industria, Gil Alves lansa programa "Povu Kuda, Governu Sosa". FOTO: dok

Maski iha ona minutu ikus atu husik hela mundu, maibé, Gil Alves la hatudu nia sfrakeza, moras ne’ebé nia sofre, hatudu nafatin oin midar no hamnasa ba ema hirak ne’ebé hale’u hela nia.

Maski semana ida iha sala kuidadu intensivu Hosptál Nasionál Guido Valadares, maibé nunka rekoñese katak nia sofre moras fuan.

Semana ida, salaun kloot ne’e sai sasin ba moras hotu ne’ebé Gil sofre, to’o husik mundu iha Domingu 17 fulan-Marsu tuku 10:00 kalan.

Triste no matan been, hafalun kaben, oan no familia, hafoin realidade mosu iha loron ne’e, maibé Maromak hadomi liu nia.

Maibé, ida ne’e mak destinu ikus husi kontribuidór ba dezenvolvimentu durante periudu ida (2007-2012) nu’udár Ministru Turizmu Komérisu no Indústria.

Tuir Família, Jacinto Alves konta tuir kronolozia, katak hafoin moras ataka iha uma, família lori kedas ba ospitál hala’o tratamentu no kondisaun fíziku matebian Gil hahú rekopera oituan hodi hein atu ba hala’o tratamentu saúde iha rai liur, maibé tanba moras ne’e ataka hikaas doutór sira mós la konsege salva nia vida.

“Moras ne’e hahú ataka iha sesta (08/03) semana kotuk, hetan atakasaun kardiolojia, ami lori ba ospitál ba iha ICU ba sala VIP nian entaun nia presiza deskansa para depois nia saúde estabiliza maka lori nia ba rai li’ur maibé to’o lokraik nia esforsu ba hariis fatin nia…monu fila-fali, entaun to’o tuku sanulu hakotu is”,informa Jacinto ba jornalista iha rezidensiál matebian, Aimutin Dili, Segunda (18/03)

Durante moris, matebian kontribui luta ba Timor-Leste nia independénsia iha 1999 hamutuk ho Maun Boot, Kay Rala Xanana Gusmão no nia belun sira seluk hanesan, atuál Reitór UNPAZ, Lucas da Costa iha Salemban Indonézia.

Hafoin Timor-Leste ukun rasik aan iha 2002, matebian hamutuk ho Proklamador Independénsia 1975, Francisco Xavier do Amaral ho lider sira seluk hamoris hikás partidu ASDT no matebian asumu kargu Sekretáriu Jerál Partidu ASDT.

Iha mandatu IV Governu Konstitusionalidade, matebian hetan fiar husi Maun Boot, Kay Rala Xanana Gusmão, asumu kargu Ministru Turizmu Komérsiu no Indústria períodu 2007-2012.

Obra ne’ebé matebian  konstrui iha nia mandatu maka, konstrusaun jardín Kristu Rei Dili, Jardim statua João Paulo II, Largu Lesidere, Jardín Motaél, Jardim iha Palasiu Governu oin, Jardim Aeroportu Komoro no reabilitasaun fatin turizmu sira seluk tan.

Iha nia mandatu Gil Alves hamosu mós programa favoritu ida ba povu agrikultór ho naran “Povu Kuda Governu Sosa” ne’ebé too agora sei kontinua implementa husi VIII Governu Konstitusionál.

Entretantu iha tinan 2015, matebian mós hamutuk ho kolega harii tan Partidu Centro Acção Social Democrata Timorense (CASDT) hodi asume kargu nuudar Prezidente Partidu too hakotu iis.

Matebian Gil hetan mós fiar husi Camara Comercio Indústria Timor-Leste (CCI-TL) hodi asmume kargu Vise Prezidente CCI-TL ba Asuntu ASIA.

Gil Alves moris iha loron 17 Setembru tinan 1958 husi aman, Libório Marques Alves (matebian) no Maria de Fatima Nheu Alves (matebian) ho maun alin na'in walu, kompostu feto haat (4) no mane haat (4).

Matebian husik hela nia kaben Aida Maria Ozório Soares ho  oan na’in neen (6) hanesan, Gilson Alves, Levy Alves, Ricardo Alves, Mesias Alves, Donato Alves no feto ikun, Graca Alves.

Nia formadu iha área Administrasaun, Ekonomia ho Jestaun husi Universidade Katólika Atma Jaya, iha Jakarta.

Matebian uluk sai nu’udar Profesór iha Fakuldade Ekonomia husi Instituisaun hanesan entre tinan 1990 no 1993.

Tuir planu, familia sei hala’o serimonia funebre ikus iha Semiteriu Bekusi Dili iha loron kinta (21/03) lokraik.

Rate this item
(1 Vote)

Independente Digital TV