Domingu, 18 Agostu 2019 | Login
Matebian Arthur, eis jornalista INDEPENDENTE Matebian Arthur, eis jornalista INDEPENDENTE

Adeus Belun, Hakmatek iha O Fatin Featured

EMA lubuk forma iha estrada-ibun bainhira karreta metan nia makina hahú lian. La kleur tan, belun di’ak ida, ne’ebé toba iha kaixaun mutin nia laran, sei ba. Karreta hahú halai, ema hirak ne’e hiit liman hodi fó adeus ba dala ikus.

Ambulansia halai ba daudauk, husik hela ema hirak ne’ebé hamriik ho idaidak nia sentimentu no memoria. Triste tan lakon belun di’ak ida. Mata-been turuk tan memoria furak ne’ebé husik hela. Fuan hanesan la fiar haree realidade ne’e.

Artur da Luz, eis jornalista INDEPENDENTE ne’ebé durante tinan haat ho balun haknar an iha jornal INDEPENDENTE fila hikas ba Aman Maromak nia kadunan Santu hafoin hetan asidente iha Fatuahi, Dili, Segunda (15/04) dader, maizumenus tuku 07:45.

Molok serbisu iha jornál INDEPENDENTE, Artur tuir formasaun jornalista iha Timor Post  durante fulan 3, hafoin sai estajiariu iha Timor Post durante fulan 6 no kontinua to’o tinan ida.

Bainhira rona jornál INDEPENDENTE loke vaga, Artur koko hodi apply no ikus mai konsege pasa no sai jornalista iha jornál refere.

Durante serbisu iha jornal INDEPENDENTE, Artur hala’o kobertura iha beat Defeza no Seguransa, hafoin muda ba serbisu beat Palasiu Governu hodi hala’o kobertura ba atividade Primeiru Ministru no Ministériu sira seluk.

Iha inisiu fulan Abril, Artur deside hodi fahe-malu ho jornál INDEPENDENTE no hahú nia serbisu foun iha Ministériu Reforma Lejislativu Asuntu Parlamentar (MRLAP).

Hafoin serbisu durante semana ida resin, akontesimentu ne’ebé ema hotu la espera mosu. Iha Segunda dader, bainhira nia hakat husi nia hela-fatin iha Akanuno, Hera atu mai serbisu, nia lakon nia vida.

Tuir informasaun, Artur ho nia rian, halai husi Hera mai iha Dili ho motor Satria ho xapa matrikula I.7982, no bainhira to’o iha kurzamentu atu tuun ba Terminal Bekora, motor ne’ebé sira sa’e halai tama rai-naruk ho klean maizumenus metru 41.

“Artur mate fatin no ida kanek todan,” informa Komandante Interino PNTL Dili, Superintendente Asistente, Euclides Belo ba jornalista sira, Segunda (15/04).

“Mensajen Ikus” iha Media Sosial

Artur nia mate la’os hamosu de’it tristeza, maibé husik mós pergunta no mistériu balun. Liu-liu haree ba ninia estatus balun ne’ebé nia update iha media sosial, Facebook.

Iha Sabadu (13/04), iha tuku 19:12 kalan, Artur update estatus kona-ba nia saudades ba nia aman ne’ebé mate ona iha tinan 2010 liu ba. Nia hakerek lia-fuan ne’ebé kompleta ho imajen rate husi nia aman.

“Eterna com Saudades Meu querido Patricio da Luz. 2010 até 2019 ita husik malu. Ne’ebé laiha novidade entre Pai ho Ami. Liu husi mehi maibé hakarak tebes kaer ho liman no haree ho matan, maibé Papa nia alma mak hamaluk ho ami,” ida ne’e mak lia-fuan ne’ebé Artur hakerek.

Hafoin, iha Domingu (14/04), tuku 06:16, Artur share maneira oinsa atu hamoos account facebook bainhira mate.

“Cara menghapus akun facebook setelah meniggal dunia. Karena meninggal tak kenal usia. Yuk setting fb nya.. semoga bermanfaat,” lia-fuan no imajen balun kona-ba hamoos account FB bainhira mate ne’ebé Artur fahe.

La’os fahe de’it iha FB, tuir kolega jornalista balun ne’ebé tama iha grupu WhatsApp palasiu governu nian, Artur screen shot no fahe tutan ba grupu refere.

Diretora jonal Timor Post Santina de Aroujo la espera lakon jornalista di’ak ida.

“Ita hotu jornalista sente lakon kolega di’ak, maibé ida ne’e mak realidade moris,” dehan nia.

Santina dehan, Artur hanesan foin-sa’e hakarak atu dezemvolve nia aan no nia kareira maibé nia mehi to’o iha dalan klaran de’it.

Atu Muda Mai Dili

Matebian nia maun, Toto da Luz, dehan iha Sabadu (13/04), nia ho Artur ba sira-nia knuar iha Buibau, Baukau hodi halo konstrusaun ba sira-nia uma. Iha ne’ebá Artur mós ba vizita sira-nia apa nia rate.

Iha Domingu tuku 9 kalan, Toto hatuun Artur iha nia hela-fatin iha Hera. Sira fila fali mai Dili, tanba tuir planu iha Segunda dader nia sei ba asina kontratu serbisu ho MRLAP.

“Ohin dader simu kontaktu urjente katak Artur hetan asidente. Ha’u hanoin asidente babain tanba hafoin to’o iha fatin akontesementu hasoru ambulansia metan mak tula mai,” dehan nia ho mata-been iha mortuariu HNGV.

Tuir Toto, nia alin molok ne’e planu ona atu muda hela fatin mai iha Dili hafoin hetan serbisu foun iha MRLAP.

Entertantu, Komadante Interinu PNTL Dili, Superintendente Asistesia Euclides Belo informa, asidente iha Fatu-ahi rezulta Artur mate fatin no ida seluk kanek todan, daudaun ne’e halo hela tratamentu iha sala ICU, HNGV.

“Akontese asidente iha tuku 7:45 iha diresaun Fatu-Ahi nian ne’ebé mak atu tuun fali ona iha área terminal Bekora, hetan asindente rezulta vitima Artur mate fatin,” dehan nia.

Euclides dehan, Artur mate dook husi estrada boot ho klean metru 41 iha Fatu-Ahi nian.

Bainhira polisia to’o iha fatin hodi halo identifikasaun, hetan Artur mate fatin no la uza kapaseti.

“Ida kanek todan ne’e mak uza kapaseti maibé hasai ona husi ulun hodi rai besik de’it iha ida kanek ne’e nia ulun,” dehan Euclides.

Polisia Tranzitu, Komandante ne’e dehan, kontinua foti hela dadus liu husi sasin sira ne’ebé haree atu halo kompleta dadus.

Ohin o nia hakat hotu ona. O nia istoria to’o ona rohan. Fuan triste no ibun toos tebes atu hatete Adeus belun. Liman mós nakdedar hanesan lakon kbiit atu hakerek lia-fuan ne’e “Deskansa ho hakmatek iha Na’i Nia reinu. Ho Domin, O deskansa iha ami fuan”.

Read 1629 times
Rate this item
(1 Vote)