AMP Husu Ajenda Fali Pedidu Dezlokasaun PR Lú Olo Ba Vatikanu Featured

By Jacinto Xavier Novembru 15, 2018 6308
Presidente Bankada CNRT, Duarte Nunes Presidente Bankada CNRT, Duarte Nunes

DILI: Hafoin bloku Aliansa Maioria Parlamentár (AMP) rasik maka vota kontra pedidu Prezidente Repúblika hodi halo viajen ba Vatikanu hodi hasoru Amu Papa Francisco, sira rasik maka husu atu re-ajenda hikas.

Presidente Bankada CNRT, Duarte Nunes hatete, iha semana hirak liu ba AMP vota kontra ona pedidu PR nian ba Vatikanu, maibé polítika ne’e iha dinámiku tanba ne’e iha ona mudansa.

AMP ne’e la'ós partidu ida de’it maibé partidu haat kedas hanesan CNRT, PLP, KHUNTO no UDT/FM, entaun nia lideransa partidu sira mós presiza konsulta malu, maibé ikus mai liu husi konsellu polítiku AMP iha ona mudansa sentimentu ba dezlokasaun Xefe Estadu ba Vatikanu.

“Ami husu meza no bankada sira seluk atu ita bele reajenda hikas asentimentu ba dezlokasaun Prezidente Repúblika ba Vatikanu”, dehan nia, iha Uma Fukun PN, horisehik.

Nia hatete, viajen ajenda ba Vatikanu ne’e iha loron 17 no sei hasoru Santu Papa ne’e iha loron 23 Novembru, tanba ne’e haree ba tempu sei disponivel atu PN bele halo pronunsiasaun hodi halo mudansa ba desizaun.

Iha fatin hanesan, tuir Deputadu Adriano do Nascimento hatete, desizaun ne’ebé foti ona ne’e desizaun hanesan polítiku na’in labele halimar ho desizaun ne’ebé foti ona.

Mundu hatene ona katak PN Timor-Leste lakohi atu Presidente Repúblika ba hasoru Santu Papa iha Vatikanu, tanba deputadu no partidu governu vota kontra viajen ne’e.

“Ha’u hanoin ita sadar ona Vatikanu ne’e importante tebes ba Timor, tanba ne’e ita sadar hodi haruka fali Prezidente Repúblika ba hasoru Santu Papa. Ha’u hanoin ne’e di'ak, maibé Presidente Parlamentu Nasionál tenke hasoru fali Xefe Estadu atu ko'alia nia hakarak ba fali ka lae”, dehan nia.

Iha fatin hanesan, Deputadu David Dias Ximenes ‘Mandati’ hatete, desizaun ne’e iha nia repregasaun rasik, tanba iha deklarasaun ne’ebé fó sai husi Prezidente PN katak Vatikanu la konvida Xefe Estadu atu ba hasoru Santu Papa, maibé Xefe Estadu mak halo pedidu atu ba hodi konvidada Santu Papa mai Timor.

Tanba ne’e, foin lalais iha loron hirak liu ba deputadu maioria mak vota kontra ona, maibé derrepente iha fali mudansa ne’e halo ema konfuzaun, tanba desizaun ne’ebé foti ne’e laiha kualidade no hanesan halimar fali.

“Ita vota kontra ona viajen ne’e iha loron hirak nia laran ona nia (Xefe Estadu) halo ona karta pedidu ida ba iha Santu Papa hodi husu ona deskulpa, hatete tanba haree ba rejimentu hotu-hotu ami nia órgaun soberania Parlamentu Nasionál la autoriza atu hasoru malu ho Santu Papa”, tenik nia.

Hanesan Presidente PN, iha autoridade rasik hodi influensia, tanba ne’e ba hasoru PR hodi ko'alia hafoin mai bankada hotu-hotu hamutuk halo fali desizaun seluk, tanba bankada sira lakohi ohin ba halo desizaun aban anula, ne’e la'ós ema polítiku.

Iha fatin hanesan, Prezidente PN Arão Noe konsidera hanoin hirak ne’ebé mai husi bankada opozisaun sira hodi husu ba tékniku PN atu manda hikas karta Gabinete PR relasiona ho asuntu ne’e.

Antes ne'e, Prezidente bankada Partidu CNRT, Duarte Nunes hatete, desizaun polítika hodi deside votu sentimentu ba dezlokasaun Prezidente Repúblika nian ne’e la'ós estátika, ohin no aban bele iha mudansa.

“Ami hanoin ita tenke fó lai tempu to’o dia 15 mak ita vota hodi deside dezlokasaun PR nian, karik iha dentru ne’e iha mudansa polítika ruma ita bele aseita”, dehan nia.

Nia hatete, AMP la'ós lakohi atu PR halo vizita Estadu ba Vatikanu, maibé presiza rezolve lai problema iha rai laran atu Amu Papa husu situasaun polítika iha Timor karik bele hataan.

Nune'e, Prezidente Parlamentu Nasionál (PN), Ãrao Noe de Jesus, hateten, viajen Prezidente Repúblika, Francisco Guterres ‘Lú Olo’ atu ba Vatikanu-Roma laiha konvite ruma husi Amu Papa, maibé nu’udar inisiativa privadu husi Xefe Estadu.

“Prezidente Repúblika dehan katak laiha konvite ida husi Amu Papa”, tenik Arão, iha Palásiu Prezidensiál, horisehik.

Tuir nia, desizaun husi Núnsiu Apostóliku promete katak pedidu ne’ebé Prezidente Repúblika nian Amu Papa konkorda no fiksa atu bele hasoru malu iha loron 23 Novembru.

Arão hatutan, Prezidente Repúblika espresa katak dezde simu pose hakarak ba vizita Roma halo enkontru ho Papa no konvida Amu Papa mai Timor.

Ne’e duni husu ba publika labele halo komentáriu oioin tanba bainhira Vatikanu konfirma bele prejudika Estadu.

Rate this item
(0 votes)

Independente Digital TV