DILI: Parlamentu Nasionál (PN) liu husi Aliansa Maioria Parlamentár (AMP) antes ne’e vota kontra dezlokasaun Presidente Repúblika (PR) nian ba Vatikanu Roma, maibé ikus mai husu re-ajenda tanba hetan orientasaun, la’ós tanba presaun husi públiku.

Presidente Bankada Partidu CNRT, Duarte Nunes hatete, antes atu fó votu asentimentu ba dezlokasaun Xefe Estadu ba Vatikanu-Roma, iha mementu ne'ebá fó ona sinál atu la ba partisipa iha plenária.

Tanba Xanana Gusmão ba hasoru ona Xefe Estadu hanoin katak sira sei ko'alia ba malu atu iha tempu badak nia laran iha mudansa polítika ruma.

Iha órgaun soberania sira hanesan Presidente Repúblika ne’e órgaun unipesoal desizaun nia mesak foti, hanesan PN ne’e órgaun koletivu, tanba ne’e atu foti desizaun ruma presiza kontaktu malu.

Nune’e, hanesan AMP iha ne’e la'ós CNRT mesak foti desizaun maibé iha Partidu KHUNTO no PLP ne’e presiza tempu atu kontaktu malu.

Tanba ne’e, iha feriadu loron hira nia-laran ne’e lideransa AMP hanesan Xanana Gusmão, Taur Matan Ruak no Naimori sira foti ona desizaun hodi fó informasaun mai iha konsellu AMP nian.

Nune’e, fó orientasaun liu husi karta mai iha bankada atu ezekuta, tanba ne’e husu atu re-ajenda hikas dezlokasaun Xefe Estadu nian ba Roma ne’e.

AMP maka hatene depois hetan kontra Prezidente Repúblika halo kedas karta ba Vatikanu karik, sei la husu atu halo re-ajendamentu.

“Ami hanoin katak sei bele atu re-ajenda tanba ne’e ami husu, maibé Prezidente Repúblika halo ona karta ba Vatikanu kona-ba viajen ne’e”, tenik nia, iha Uma Fukun PN, horisehik.

Duarte hatete, situasaun polítika saida mak akontese iha PN ami iha ne’e informa ba iha lideransa sira atu tetu hodi fó orientasaun polítika tanba bankada ne’e hala’o polítika partidu nian.

Nia hatete, lideransa nasaun ne’e nian mesak ema rezisténsia Xanana Gusmão, Taur Matan Ruak, Lu-Olo, Lere no sira seluk, tanba ne’e saida mak akontese ne’e sira hatene hela, fiar katak loron ruma sira ko'alia ba malu maski neineik maibé buat hotu sei la’o di'ak.