Alkatiri dehan, Jakarta II hanesan hanesan fatin istóriku ida, tan ba fatin ne’e ema barak ne’ebé forsa Indonézia sira halo mate la’ós iha de'it iha Munisípiu Ainaru laran maibé, balun mós forsa Indonézia sira kaer mós timoroan balun husi munisípiu seluk mós mai fakar hotu iha fatin ne’e.

 “Ne’e fatin istóriku serve ba ita nia polítiku, serve ba ita nia istóriku rasik atu hakerek iha ita nia istória rasik, no serve mós ba ita nia ekonómika para dezenvolve lori turizmu mai tanba ne’e ha’u iha hanoin atu hari mós sentru turizmu iha fatin ne’e hodi serve mós ba ita nia jerasaun foun sira hatutan ita nia istória ida ne’e ba oin,” dehan Alkatiri bainhira hala’o vizita ba monumentu Jakarta II Postu Ainaru, Munisípiu Ainaru hodi fó omenajen ba matebian sira ne’ebé, Sesta (30/06).

 Nia dehan, fatin ne’e komesa atu monu daudaun ona, no FRETILIN sei koordena ho governu atu hadi'a lalais fatin istóriku ne’e.

 Tuir nia katak, governu presiza halo fatin monumentu istóriku sira hotu ho dignu no diknidade para reprezenta TL nia eroi.

 Iha fatin hanesan Koordenadór Veteranu Munisípiu Ainaru, Francisco Barros dehan katak iha fatin ne’e tuir dadus husi Komisaun ba Akollamentu Verdade no Rekonsiliasaun (CAVR) ne’ebé hato’o relatóriu husi sira nia peskiza katak iha fatin ne’e iha eroi rihun 18 maka fakar iha fatin ne’e husi territóriu tomak.

 Nia dehan fatin ida ne’e iha ona governasaun balun maka ba haree ona atu hari sentru turizmu komunitariu.