Alkatiri: “Ha'u sei Ko'alia ho Partidu 21 Servisu Hamutuk” Featured

By : Humberto dos Santos Jullu 27, 2017 3243
Alkatiri Alkatiri

DILI: Sekretáriu Jerál partidu FRETILIN, Mari Alkatiri deklara katak sei ko'alia ho partidu polítiku 20 sira seluk ne’ebé partisipa iha eleisaun lejizlatura períodu 2017-2022 atu serbisu hamutuk lori dezenvolvimentu Timor-Leste ba futuru.

“Ha'u sei ko'alia ho sira seluk mós. 21 partidu polítiku sira partisipa iha eleisaun atu kria klima konfiansa entre lideransa partidária no entre partidu polítiku sira hotu-hotu para… serbisu hamutuk oinsá atu lori dezenvolvimentu ba rai ida ne’e,” dehan nia, iha Palasiu Prezidensiál, Ai-Tarak Laran, horisehik.

Nia esplika, kompromisu partidu FRETILIN iha kampaña dehan ona katak bainhira FRETILIN la hetan maioria absoluta tenke serbisu hamutuk ho partidu seluk bele halo koligasaun, bele iha Governu minoritária inkluzaun, bele iha Governu minoritária insidénsia parlamentár no iha forma oioin ne’ebé bele uza.

Kona-ba soru-mutu ho Prezidente Repúblika, Francisco Guterres ‘Lú-Olo’ la diskute kona-ba atu formasaun Governu foun, tanba sei hein apuramentu husi Tribunál Rekursu.

Tanba ne’e, Eis Primeiru Ministru ne’e dehan, kona-ba atu halo formasaun Governu nian seidauk tempu, tanba Commissão Nacional Eleições (CNE) sei halo apuramentu seidauk hotu, depois sei lori ba Tribunál Rekursu halo konfirmasaun.

Maski nune’e, FRETILIN laiha duvida ruma hodi loke nafatin dalan ba koligasaun ho partidu CNRT ba formasaun governu.

 

Rate this item
(2 votes)
Last modified on Domingu, 30 Jullu 2017 10:19

Independente Digital TV