UPM Kontra Desizaun Tribunal, sei Kaer Arguidu 4 ne’ebé “Husik Livre” Featured

By Domingos Gomes Jullu 24, 2019 3974
Foto antigu Diariu INDEPENDENTE Foto antigu Diariu INDEPENDENTE

DILI: Komando Unidade Polisia Militar (UPM) la konkorda ho desizaun Tribunal Munisipiu Dili (TMD) ne’ebé aplika aprezentasaun periodika ba arguidu na’in haat ne’ebé envolve iha kazu ta’a membru F-FDTL Abilio Babo.

Iha semana kotuk, TMD halo interogatoriu dahuluk ba arguidu na’in lima ba kazu ta’a membru F-FDTL iha area Bebonuk, Domingu (14/07).

Iha ninia desizaun TMD aplika medida koasaun prizaun prenvetiva ba arguidu ho inisial KB no medida koasaun aprezentasaun periodika ba arguidu na’in haat seluk ho inisial AC, NB, LP no DNS.

Ba desizaun TMD ne’e, Komandante UPM Maijor Abel da Costa Xavier “Niki” lamenta. Tanba konsidera loloos sira na’in lima tenke tama hotu prizaun preventiva.

“Tuir loloos ne’e suspeitu na’in lima ne’ebé ta’a membru F-FDTL, sira tenke tama hotu iha prizaun preventiva, maibé sira (TMD) husik sai de’it”, deklara Niki iha nia knar fatin, Segunda (22/07).

Ho nune’e, Maijor Niki dehan, nia sei hein Xefe Estadu Maior F-FDTL Maijor Jeneral Lere Anan Timur fila husi Australia hodi husu autorizasaun atu kaptura fila fali arguido na’in haat ne’ebé TMD husik.

“Ha’u hakarak ne’e sira na’in lima tenke kastigu hotu, maibé tanba saida mak sira na’in haat ne’e tribunal ba husik sai fali ne’e. Ha’u sei hein ha’u-nia superior (Maijor Jeneral Lere) ba iha li’ur fila mai ha’u husu fó autorizaun atu kaer fali (arguidu na’in haat) ida ne’e mak ha’u-nia desizaun.

”Tuir nia, ida ne’e nu’udar kazu ba dala rua ne’ebé tribunal husik arguidu sira ne’ebé ta’a membru F-FDTL. Iha kazu ta’a membru Naval iha area Bekora iha tinan kotuk, nia dehan, tribunal mós husik sai arguido sira. Iha altura ne’ebá, nia dehan, hafoin tribunal husik nia parte ba kaer fali suspeitu sira hodi sulan iha kuartel PM to’o fulan tolu.

“Tribunal mai hasoru ha’u haruka sira ba husu iha Jeneral Lere mak bele responde. Tanba ida ne’e justu ka la justu? Ha’u sei hein ha’u-nia komandante mai ha’u sei ba hasoru nia atu aprezenta ba nia, bainhira nia dehan ida ne’e la di’ak, haruka ba kaer fali, ha’u protu atu ba kaer fali,” dehan Niki.

Juis prosesu José Maria de Aroújo, hatete tribunál aplika prizaun preventiva ba arguidu KB tanba deskonfia sai autór prisipál taa membru F-FDTL ho naran Abilio Babo iha Bebonuk, Domingu (14/07).

Molok ne’e, Juiz Prosesu José Maria de Aroújo hatete, tribunál aplika prizaun preventiva ba arguidu KB tanba deskonfia sai autór prisipál ta’a membru F-FDTL ho naran Abilio Babo iha Bebonuk, Domingu (14/07).

Ba arguidu na’in haat, juiz ne’e hatete, tribunál aplika medida koasaun aprezentasaun periodika hodi hein prosesu investigasaun ne’ebé hala’o husi Ministériu Públiku.

Defeza husi arguidu KB, Estaquio Guterres dehan maski tribunál deskonfia maka’as arguidu KB mak ta’a lezadu, maibé laiha evidensia forte.

Defeza ne’e dehan iha aundesia julgamentu hatudu momoos katak arguidu na’in lima ne’e la envolve iha kazu tentativa omesidu ne’e tanba akontesementu iha fatin seluk no arguidu na’in lima hela iha fatin seluk.

“Ita-nia polisia intelijen sira balun ba kaptura arguidu sira iha nia fatin no mai detein iha polisia militár nia fatin komesa iha tuku 11:00 kalan depois tuku 6:00 mak lori mai iha polisia nia fatin,” nia dehan. Ho nune’e, defeza husi arguidu KB sei hatama rekursu ba tribunál hodi kontra desizaun prizaun preventiva ne’ebé aplika ba nia kliente.

Rate this item
(3 votes)

Independente Digital TV