“Ohin hato’o mós ba Prezidente Repúblika (Lu Olo) ita komesa hahú haree ona prevensaun, sasan sira ne’e mai tama iha Timor, sai fali husi Timor liu husi fronteira, tanba ne’e halo avaliasaun sistema integradu sira iha fronteira no aeroportu,”deklara PJR José hafoin hasoru-malu ho PR Lu Olo iha palasiu prezidensial Bairro-pite, Segunda (22/07).

Tuir nia, durante ne’e sasan illegal fasil liu atu tama liu husi aeroportu tanba kontrolu ne’ebé fraku tebes.

“Liu iha aeroportu ne’e fasil liu tanba ema kontrola ne’e dala-ruma ba tuur tiha iha fatin seluk, ema la’o liu tiha, sasan to’o tiha iha ne’eba mak hakfodak”.

Tan ne’e, nia husu ba autoridade seguransa sira, liu-liu alfandega ne’ebé serbisu iha aeroportu atu halo investigasaun dala rua ba sasan sira ne’ebé tama.

“Tanba kilo boboot sira hanesan ne’e tama mai la hatene. Tanba ne’e husu ba autoridade sira idaidak haree kona-ba prevensaun ida ne’e,” dehan nia.

Kona-ba prosesu ba kazal Timor-oan ne’ebé daudauk ne’e detein iha Indonezia, PJR ne’e dehan, prosesu ba sira-nia kazu iha hela faze inisiu.

Nia dehan, Ministériu Públiku Timor Leste no Indonezia hamutuk halo investigasaun tanba Timor Leste no Indonezia ratifika hotu konvensaun internasional kona-ba krime tranzisional.

“Tanba ne’e fó took informasaun, husu ba malu, hodi hare’e kona-ba boa administrasaun justisa ninian, di’ak liu haruka mai iha ne’e ka detein iha ne’eba, ne’e depende aprofundamentu investigasaun mak bele decide”.

Maske nune’e, PJR ne’e dehan, Timor Leste tenke respeita Indonezia nia sistema no Indonezia mós respeita Timor Leste ninia Sistema.