DILI:Rezolusaun Governu laos aplika ba sidadaun hotu-hotu labele sai ou tama, maibé ho kondisaun ida katak Timoroan sira ne’ebé durante ne’e iha estranjeiru bele tama mai maibé tenki karantina durante fulan ida, relasiona ho corona virus ne'ebe bele da'et ba ema liu interasaun. 

Enkuantu, ema estranjeiru sira ne’ebé durante ne’e hala’o servisu iha Timor-Leste ou halo vizita turista bele fila fali ba ida-idaik nia fatin, maibé sei la autoriza tama fali tan molok kompleta fulan ida iha liur.

"Ba sidadaun Timor-oan sira ne’ebé foin mai husi estranjeiru tenke volutariamente tama iha karantina iha uma durante loron 14 labele sai, ne’e seriu. Medida sira ne’e sei aplika durante fulan ida nia laran hafoin halo mudansa,"dehan Ministru Reforma Lejislativa Asuntu Parlamentar (MRLAP) Fidelis Leite Magalhaes.

Ministru ne'e husu mós ba Timor-oan sira ne'ebé foin fila mai husi rai li'ur atu labele buka malu hodi ba pasiar iha fatin públiku.

"Tantu funsionariu estadu sira (foin mai husi rai liur) labele ba serbisu durante loron 14, tenke informa mós ba pesoal saúde," dehan nia.

Sidadaun Nasaun Seluk Bele Sai

Iha fatin ketak, Ministru Negosiu Estranjeiru no Kooperasaun, Dionisio Babo hatete, governu Timor-Leste fó liberdade ba sidadaun nasaun seluk iha Timor-Leste atu hili hela nafatin iha TL ka fila fali ba sira-nia rai.

"Embaixadór Portugal mós husu ona nia sidadaun sira ne'ebé iha Timor-Leste konforme sira see mak hakarak bele halo ona evikasaun ba sira-nia nasaun, maibé tanba nasaun barak mós taka ona sira-nia aeroportu nune'e sira bele proteze aan de'it iha ne’e,"dehan Babo.

Ba Timor-oan ne'ebé hakarak sai ba rai li'ur, Dionisio dehan, bele ba nafatin maibé idaidak tenke proteje nia an.

"Sidadaun Timor-oan sira bele tama maibé tenke tuir prosedur karantina ne'ebé Ministériu Saúde tau ona," dehan nia.