Enkuantu, empreza CVT ne’e aluga edifisiu iha andár-lima iha Torre ETO, Mandarin, Díli.
Ekipa konjunta ne’ebé lidera husi Superintendente Asistente Polísia Mouzinho Tavares Correia ho ekipa hala’o inspesaun ba fatin refere, mais ou menus iha tuku 15:00 lokraik, iha loron Kuarta (10/12).
Inspesaun ne’ebé hala’o durante oras hirak nia laran nota katak, iha sala haat ne’ebé kompañia refere uza ba atividade servisu maka, sala primeiru komputadór marka Dell ho unidade 52, laptop Lenovu 17, LED ka Layar TV 2, sala Segundu komputadór Samsung unidade 2, laptop Acer 1, printer Epson 1.
Nune’e mós, ekipa kontinua tama ba iha sala terseiru hanesan, iha komputadór LG unidade 16, inklui mós asesoris seluk ne’ebe falun hela iha kaixa laran no sala dahaat mak jerente CVT nia eskritóriu ne’ebé kompleta ho fasilidade komputadór Samsung 1 no laptop HP 1 no Acer 1 iha laran no mós kuartu kiik ida ne’ebé monta asesoris eletroniku nian.
Ho nune’e, hafoin hao inspesaun ne’e, ekipa asegura ona evidensia sira, inklui dada fita polisia nian ka police line ba sala rua ne’ebé kompañia refere utiliza ona ba servisu, sala rua seluk haree katak ekipamentu iha ona laran, maibé seidauk monta no seidauk halo ba servisu, nune’e la dada “police line”.
Aliende, durante inspesaun ne’e, autoridade Polísia mós lori kedas traballadór Timoroan na’in-haat ba halo identifikasaun iha Komandu Jerál Polísia Nasionál Timor-Leste (PNTL), iha gabinete Diresaun Servisu Investigasaun Kriminal, Kaikoli no mós asegura mós pasaporte rua.
Durante inspesaun ne’e, Timoroan ida ne’ebé servisu besik liu jerente ho nasionalidade Singapura ne’e, klarifika liuhusi konversa ho autoridade seguransa katak, sira hetan lisensa mak loke atividade ne’e, atividade ne’e sosiu nain tolu mak hamutuk, maibe nain-rua seluk servisu iha estranjeiru.
Maibé nia rasik mós la iha koñesimentu kle’an kona-ba atividade refere, tanba antes ne’e loke vaga ema kuaze rihun rua (2.000) resin mak mai aplika maibé passa ne’e la to’o na’in-20.
Entretantu, empreza Kapitál Venturas Timor, la’ós empreza ETO nian, maibé empreza seluk ida mak halo sosiu hodi halo arrendamentu ba andar lima iha Torre ETO, hodi halo sira-nia atividade. Nune’e, kualkér atividade ne’ebé la’ós tuir lei mak responsabilidade eskluziva husi CVT la’ós husi empreza grupu ETO.
Razaun ne’ebe ekipa konjunta uza kompetensia nu’udar orgaun polisia kriminal hodi halo inpesaun ba iha atividade husi empreza refere, tanba autoridade hetan informasaun, no la’os hetan mandadu buska husi Ministeriu Publiku. Nune’e, ekipa ne’e ba halo inspesaun, tanba deskonfia katak, empreza ne’ebé pratika atividade jogu online iha área refere, ne’e ilegal.
Enkuantu, tuir observasaun Online INDEPENDENTE nian iha terenu nota katak iha sala primeiru, komputadór 4 maka monta ho modelu rin ida, maibé 4 uza keyboard ida de’it no koneksaun ba laptop ida, total komputador marka Dell iha sala primeiru ne’e hamutuk 52, maibé traballador Timoroan na’in-tolu deit inklui sidadaun estranjeiru mane ida mak halo hela atividade servisu iha laran, enkuantu, komputador sira seluk taka mate no la uza.
