Tuir komunikadu ne’ebé Online ne’e asesu iha Pajina Gabinete Primeiru Ministru haktuir katak, Primeiru-Ministru (PM), Kay Rala Xanana Gusmão observa katak durante prosesu negosiasaun iha ronda da-ruak ne’e, ekipa husi parte rua hatudu vontade bo’ot ne’ebé hakarak tebes atu rezolve duni fronteira marítima rai rua nian.
“Ha’u labele ko’alia buat barak tanba formalmente ita foin hahú agora iha Jogjakarta. Ne’e duni, ha’u espera katak negosiasaun tuir mai iha fulan-Abríl, tinan oin sei bele dehan buat ruma. Ha’u labele dehan ha’u kontenti tebes, maibé satisfeitu tanba ita haree katak ita bele ko’alia ba malu, bele simu ideias ba malu. Ida-ne’e mak prinsípiu di’ak ida iha negosiasaun ne’ebé difísil kona-ba fronteira marítima,” dehan PM Xanana liu husi Komunikadu ne'ebé online INDEPENDENTE ne’e asesu, Kinta (11/12).
Xefe Governu haktuir, negosiasaun formál primeira ronda hala’o iha fulan-Agusto 2025, iha Dili no segunda ronda hala’o iha Jogjakarta. Ekipa konkorda ona atu kontinua negosiasaun formál tuir-mai iha fulan-Abríl 2026.
“Durante loron-rua ho balun ne’e, diskusaun la’o di’ak, ho abertura husi parte Indonézia lidera hosi Embaixadór Amrih. Ita senti katak iha abertura, iha kooperasaun, iha duni vontade husi Governu Indonézia atu rezolve ita-nia fronteira maritima,” PM Xanana subliña.
Entretantu, negosiasaun formál segunda ronda kona-ba Fronteira Marítima iha Jogjakarta hala’o durante loron-tolu ne'ebé hahú husi loron 8-10 Dezembru 2025 no taka ho asina akta husi Xefe delegasaun nasaun rua nian.
Enkuantu, Timor-Leste asina husi atuál Diretora Ezekutiva Gabinete Fronteira Terestre no Marítima (FTM), Elizabeth Exposto. Nune’e, Indonézia asina husi Diretór Jerál Asuntu Jurídiku no Tratadu Internasionál sira, Ministériu Negósiu Estranjeiru, Embaixadór L. Amrih Jinangkung, iha The Phoenix Hotel, Jogjakarta, Indonézia, kuarta (10/12/2025).
