Domingu, 08 Dezembru 2019 | Login
Ekipa operasaun konjunta Ekipa operasaun konjunta

Razaun Prende Karreta ADN, Konsultór Uza Tula Feen-oan ba Haan Featured

DILI: Karreta Ajensia Dezenvolvimentu Nasionál (ADN) ne’ebé autoridade prende iha duni karta autorizasaun atu halo movimentu sees husi oras serbisu, maibé uza sala tanba tula fali feen ho oan ba haan.

Tuir informasaun husi Diresaun Tranzitu Nasionál, Polisia Nasionál Timor Leste (PNTL), karreta ADN ho matrikula 05-348G ne’ebé prende iha Domingu (30/06), kondus husi konsultór ADN ne’ebé identifika nu’udar sidadaun Indonezia.

Liu husi operasaun konjunta entre Komisaun Anti Korrupsaun (KAK), PNTL, Diresaun Nasionál Transporte Terrestre (DNTT), Diresaun Nasionál Seguransa Rodavária (DNSR), kaptura no detein konsultór ADN ne’e.

Pontu Vokal DNSR, Ministériu Interior, Alípio José Vieira informa, ekipa konjunta kaptura konsultór ADN iha  area Kolmera, tanba utiliza karreta estadu ba interese privadu.

Alípio dehan, bainhira ekipa konjunta halo pasa revista, konsultór refere hatudu duni karta autorizasaun sirkula iha loron Sabadu no Domingu. Maibé ekipa deside hodi kaptura tanba konsultór ne’e la halo serbisu estadu nian.

“Señor ida, ema estranjeiru, husi Indonezia, hanesan konsultór (iha ADN), nian mak lori (karreta) hodi tula nia feen ho oan ba haan,” informa Alípio Jose ba jornalista sira, iha nia knar fatin, Ministériu Interior, Villa Verde, Segunda (01/07).

Nia hatete, lei vale ba ema hotu-hotu, la haree ba nia pozisaun, katak funsionáriu hotu-hotu ne’ebé utiliza patrimóniu estadu tenke kumprimenta regra ne’ebé hatuur ona iha Dekretu Lei Númeru 8/2003, 18 Jullu, kona-ba atribuisaun no utilizasaun karreta estadu.

“Ami nia baze legál mak ida ne’e hodi kaer nia, tanba nia la’os halo atividade estadu nian,  maibé halo atividade privadu, familia nian,” nia afirma.

KAK:Tula Familia ne’e Problema

DILI:Komisariu Komisaun Anti Korrupsaun (KAK) Sergio Hornai hatete, ekipa konjunta halo kapturasaun no detein infrasór sira ne’ebé uza patrimoniu estadu la tuir regra ne’ebé defini ona iha dekretu lei númeru 8/2003.

Iha operasaun ne’ebé ekipa konjunta halo, Sergio dehan, konsege deteta katak iha funsionariu nasionál no intenasionál ne’ebé hala’o hela sira-nia funsaun iha Timor Leste uza patrimoniu estadu sees husi oras serbisu no la halo serbisu propriu tuir lei haruka.

Nia hatutan, ema hotu-hotu esegura katak patrimoniu ne’ebé atribui ba funsionariu nasionál ka intenasionál ninia finalidade mak atu apoiu ka reforsa serbisu administrasaun funsaun públika ninia.

Kona-ba kapturasaun ba konsultór ADN, Komisariu KAK ne’e dehan, iha momentu halo kapturasaun konsultór ne’e iha dokumentus komprovativus.

“… Ami laiha problema, maibé tula familia ne’e problema povu  Timor nian,” dehan nia.

Hatan ba prosesu ba funsionariu sira ne’ebé detein, Komisariu ne’e hatan katak, KAK halo auto partisipasaun ba iha Ministériu Públiku hanesan titular ba asaun penal. Tuir kodigu prosesu penal iha dentru prazu oras 72 halo submisaun ba iha Tribunál atu bele tuir interogatoriu dahuluk.

Entretantu, molok ne’e Tuir informasaun ne’ebé diáriu ne’e rekolla, hafoin karreta ADN hetan prende mosu kedas reasaun husi Eminente Espesiál g7+, Kay Rala Xanana Gusmão.

Informasaun ne’ebé diáriu ne’e rekolla husi fonte ne’ebé besik ADN deklara katak, hafoin karreta ne’e prende Xanana halo kedas vizita ba edifísiu KAK nian iha Faról, maibé la tama ba edifísiu laran. Ekipa sira maka tun hodi halo negosiasaun ho funsionáriu KAK nian.

Nune’e, hafoin rona husi ekipa KAK nian katak karreta ADN nian ne’e lori ona ba Kuartél Jerál PNTL, entaun Xanana ho ninia ekipa kontinua halo vizita ba Kuartél Jerál PNTL, maski nune’e, eis-Primeiru Ministru Governu Aliansa Maioria Parlamentár (AMP) ne’e la tun husi karreta.

Ekipa sira Halo maka tun hodi ba haree karreta ne’e no halo diskusaun ho membru PNTL sira iha kuartél laran.

Maski nune’e, rezultadu ikus liu, karreta ADN nian ne’e kontinua prende tanba konsidera viola regra uzu patrimóniu estadu nian.

Entretantu, Adjuntu Diretór Jerál AND, Rui Lourenço da Costa hateten, karreta ADN nian ne’e konduz husi asesór ADN nian ida husi Indonézia ne’ebé mai serbisu iha Timor-Leste tanba kooperasaun G to G.

Asesór ne’e mai serbisu ho saláriu tuir padraun nasionál nian no mós hetan priviléjiu husi Governu Timor-Leste hodi fó tratamentu dignu ba nia durante iha Timor-Leste.

“Tanba ne’e, Governu iha responsabilidade hodi fornese transporte ba sira nia atividade partikular no serbisu loron-loron nian”, dehan Rui.

Tuir nia, asesór ne’e la halo infrasaun tanba hetan autorizasaun husi Diretór Jerál no iha karta kondusaun. Maibé, KAK konsidera ema ne’e envolve infrasaun hodi kontinua prende ninia karreta, inklui pesoál ne’e detein iha sela durante oras 72 hodi submete ba prosesu investigasaun.

“Proxima-vés labele trata ami hanesan na'ok-teen. Ami nia staff halo serbisu sira tenke respeita”, tenik nia.

Tuir Rui, situasaun ne’e halo Governu mak sei mo’e tanba prezensa asesór nian iha Timor Leste bazeia ba kooperasaun G to G, ne’ebé bazeia ba pedidu husi Timor Leste nian. Ne’e duni, Governu iha responsabilidade ba pesoál ne’e rasik.

Entretantu, informasaun ne’ebé diariu ne’e hetan, KAK prende no detein asesór ADN nian ba sela tanba konsidera halo infrasaun, liu-liu utiliza veíkulu estadu nian iha loron feriadu ba atividade privadu nian.

“Ami ezekuta de’it lei ne’ebé mak iha. Ami la'ós prende karreta sira ne’e tuir ami ninia hakarak”, dehan fonte ne’e.

Read 2121 times
Rate this item
(0 votes)
MidAd1