Iha fatin hanesan, Xefe Suku Ulmera, Martinho Correia, informa dada bandeira meia haste ne’e hanesan sentidu kle’an ba saudozu Samba Sembilan nu’udar aman lutadór ninia mate.

Iha parte seluk, Juventude Rezisténsia Ulmera-oan, Guntur hateten, razaun dada bandeira iha klaran tanba Samba Sembilan mós fó kontribuisaun maka’as prosesu funu ne’e to’o remata.

“Ida ne’e ami hatudu ami-nia omenajen ikus ba saudozu”, dehan nia.

Nune’e mós juventude Joni Pereira hateten, sentidu ne’ebé hatudu liuhusi dada bandeira meia haste hodi respeita saudozu nia luta.

Maioria Veteranu Hato’o Omenajen

Maioria veteranu sira konsentra iha Suku Ulmera, Postu Bazartete, Munisípiu Likisá hodi presta omenajen ikus ba Saudozu Jaime Ribeiro ‘Samba Sembilan’.

“Ami kuaze husi veteranu iha territóriu tomak sente triste ho maun Samba Sembilan nia mate”, dehan Asistente Polítika Rejiaun III, Pascoal Ximenes Pereira ‘Nixon’.

Nia hatutan, Samba Sembilan mós la’ós ema ida kualkér iha prosesu luta nian. Tanba ne’e, husu ba Estadu tenke valoriza didi’ak Saudozu Samba, tanba maioria labarik (nia-oan) sira ne’e sei ki'ik.

Iha fatin hanesan, José dos Santos Lemos ‘Komandante Labarik’, sente triste bainhira rona informasaun Samba Sembilan lakon ninia vida.

Prosesu peregrinasaun iha mundu maka nune’e ona, maibé husu ba Estadu tau matan didi’ak ba veteranu sira, tanba kondisaun família veteranu moris vulneravel tebes.