Diretór Jerál Servisu Migrasaun, Superintendente Asistente Boavida Ribeiro hatete, husi sidadaun entranjeiru na’in 10 ne’e, na’in ida nu’udar sidadaun Vietname no na’in sia seluk nu’udar sidadaun Indonezia.

“Horikalan (Kinta kalan) migrasaun hetan orientasaun husi Komandante Jerál, hamutuk ho ekipa konjuntu hodi halo inspesaun ba iha area Fatuhada ne’ebé mak iha informasaun katak deskonfia iha atividade tráfiku umanu.”

“Tanba ne’e iha inspesaun ne’e ita konsege deteta sidadaun estranjeiru na’in 10, kompostu husi feto ida no mane na’in-9, iha bar ka diskoteka ida ne’ebé lokaliza iha area Fatuhada,” informa Boavida ba jornalista INDEPENDENTE liu husi telefone, Sesta (19/07).

Hafoin kaptura, ekipa konjunta lori sidadaun estranjeiru hirak ne’e ba edifisiu Migrasaun, Ministériu Interior, Villa Verde hodi submete ba prosesu investigasaun.

“Agora prosesu investigasaun la’o hela iha fatin imigrasaun nian, ami halo identifikasaun durante 12 tempu, depois ita halo koordenasaun ho Ministériu Públiku (MP) par bele hetan orientasaun tuir mai, karik iha indísiu forte,” dehan nia.