João Bosco ne’ebé hala’o estudu iha universidade ida iha Yogyakarta deskonfia hetan oho husi ema liu na’in ida entre loron 2 Jullu to’o 7 Jullu 2019. Tanba, bainhira hetan nia isin-mate ho kondisaun dodok ona.

Tuir mai Jornal INDEPENDENTE rezumu informasaun ne’ebé públika iha media online Indonezia, detik.com.

"Polda DIY iha loron 3 Jullu 2019 tuku 13.00, simu keixa ema lakon ho naran João Bosco," dehan Kabid Humas Polda DIY, Kombes Pol Yuliyanto, hanesan sita husi detik.com.

Liu tiha loron ida, polisia DIY (Daerah Istimewa Yogyakarta) simu tan keixa katak deskonfia ema naok ona João Bosco.

"Iha loron 4 Jullu tuku 15.00, ami simu keixa katak ema naok João Bosco. João sidadaun Timor Leste, nu’udar estudante universitariu iha Yogya," nia esplika.

Yuliyanto hatete, bazeia ba informasaun husi keixa ne’ebé tama iha polisia DIY, kronolojia vitima nia lakon hahú iha Tersa (2/7) maizumenus tuku 11.00. Momentu ne’ebá vitima iha hela kuartu laran ho nia kolega, iha area Banguntapan, Bantul.

"Informasaun husi ema ne’ebé fó keixa, momentu ne’eba derrepente ema na’in tolu mai hodi bolu vitima. Vitima mós ba hasoru ema na’in tolu ne’e. Hafoin ida ne’e to’o loron hato’o keixa la hatene loos vitima nia paradeiru iha ne’ebé,” nia esplika.

Hafoin lakon durante loron 12, ikus mai ema hetan mate-isin ho kondisaun nakonu ho kanek iha rai-naruk Cemorosewu.

"Ikus mai ema hetan mate-isin Mr X iha Magetan iha 14 Jullu, rezultadu identifikasaun garante katak (mate-isin) ho naran João Bosco," dehan Yuliyanto, Kinta (18/7/2019).

Rezultadu identifikasaun husi ekipa Inafis no DVI, deskonfia vitima mate entre loron 2 Jullu to’o 7 Jullu.

Polisia deskonfia João Bosco hetan oho. Polisia DIY forma ona ekipa hodi kasa suspeitu, tantu autór oho ka sira ne’ebé envolve halo torturasaun ne’ebé rezulta vitima mate.

"Liu husi prosesu naruk, ami hetan informasaun ne’ebé dirije ba suspeitu. Alhamdulillah ami iha ona dadus kona-ba suspeitu, hein tempu de’it (kaptura)," dehan diretór Reskrimum Polda DIY, Kombes Pol Hadi Utomo.

Autor Liu Na’in Ida

Polisia deskonfia autór ne’ebé oho João Bosco Baptista liu ema na’in ida.

"Ita deskonfia, iha ema balun (autór), klaru katak liu ema na’in ida,” dehan Diretór Reskrimum Polda DIY, Kombes Pol Hadi Utomo, Kinta (18/7/2019).

Polisia husu tempu atu bele kaptura autór sira iha loron rua ka tolu oin mai.

"Alhamdulillah ita iha ona dadus, hein tempu de’it ona. Tanba horseik ita foku ba identifika vitima,” dehan nia.

Aleinde ne’e polisia mós halo ona interogasaun ba sasin na’in sia.

"Provizoriamente iha sasin na’in sia ne’ebé hetan ona interogasaun," dehan Hadi Utomo.

Entretantu, Polisia DIY promete iha loron 2 to’o loron 3 nia laran sei kaptura autór sira ne’ebé envolve iha kazu oho João Bosco.

"Iha loron rua ka loron tolu bele asegura ona (autór) balun, nota ida ne’e,” dehan Kabid Humas Polda DIY, Kombes Pol Yuliyanto.