Governu Buka Ema Kaer Lafaek Featured

By Lígia Noronha Agostu 29, 2017 1699
Lafaek Lafaek

DILI: Governu hahú ona estuda hodi halo identifikasaun ba área sira ne’ebé risku lafaek tata ema. Ne’e duni, oras ne’e buka hela ema tékniku sira hodi bele kaer lafaek ne’ebé dala barak mosu iha lokalidade populasaun sira nian.

Ministériu Komérsiu indústria no Ambiente (MKIA), liu husi diresaun Protesaun Rekuperasaun Bio-diversidade Ambientál, buka hela tékniku sira oinsá atu kaer lafaek.

“Ita tenke prepara buka ema hodi kaer lafaek, oinsá identifika no halo peskiza ba fatin hirak ne’ebé populasaun hela barak no lafaek hela ba no fatin ne'ebé lafaek gosta tata ema, depois ita halo mekanizmu atu kaer”, dehan Diretór Jerál Ambientál, João Carlos, iha nia knaar fatin, Fomentu, horisehik.

Nia dehan, agora daudauk MKIA iha hela etapa ida, atu governasaun foun ne’e tau orsamentu uitoan para buka ema para treinu tékniku oinsá atu halo jestaun ba lafaek.

Diretór ne’e esplika, mekanizmu atu kaer lafaek tenke iha ekipamentu atu kaer, ema bele kaer maibé ekipamentu laiha susar uitoan.

“Ita kombina ona buat rua, ita iha ema matenek lokál, ita hamulak de'it avó bele mai de'it. Ida fali, ema matenek nia tenke iha tempu hodi haree avó lafaek ne’e gosta sai ba buka hahán no ataka ema”, dehan João.

Maski nune’e, nia esplika, estratéjia hirak ne’e presiza iha duni fasilidade oioin hodi deteta avó ninia movimentu iha ne’ebé entaun uza buat rua ne’e hodi bele rezolve para bele kaer.

Tanba, daudaun iha ona lafaek tolu maka sulan hela iha nia luhan. Lafaek hirak ne’e la’ós ba kaer iha tasi, maibé ekipa tékniku ambiente nian ba foti husi komunidade sira ne'ebé durante ne’e hakiak hela.

Maibé, problema ida maka luhan lafaek nian iha dolok-oan ne'ebá dook husi ministériu, entaun presiza tau ema para lori hein. Provizoriamente seidauk iha ema ruma hodi hein iha ne'ebá.

Nia dehan, MKIA halo ona pedidu no tau ona ema na’in tolu sai hanesan seguransa hodi hein. Ema hirak ne'ebé atu ba hein la’ós ba haree de'it, maibé sira nia funsaun ba dahuluk atu haree ba iha bee tenke la’o estavel. Seluk fali, nian hahán no ikus liu mak haree ba komunidade sira labele ba besik hodi tuda halimar.

Governu hanoin ona atu servisu hamutuk ho kompañia privadu balun halo armadilla boot ida oinsá kaer lafaek, maibé iha ona prosesu diskusaun nia laran. 

Rate this item
(0 votes)

Independente Digital TV