Deskonfia Posse ba Kandidatu Embaxadór iha Tendénsia Politika Featured

By INDEPENDENTE Agostu 17, 2019 4649
Kandidatu embaxador simu posse. Foto Gabinete Presidente Republika. Kandidatu embaxador simu posse. Foto Gabinete Presidente Republika.

DILI:Bankada Governu iha Parlamentu Nasionál deskonfia Prezidente Repúblika (PR), Francisco Guterres Lú Olo ne’ebé fó posse de’it ba kandidatu embaxadór na’in tolu ne’e iha tendénsia politika.

Deputada Bankada Partidu Libertasaun Populár (PLP), Maria Angelina Sarmento deskonfia iha tendénsia politika tanba sira na’in tolu ne’e iha ligasaun ho partidu balun.

Maibé, ba sira seluk ne’ebé sei pendente tanba laiha koneksaun ho partidu ne'ebé afavor ba sira-nia interese.

“Normalmente bainhira hato’o nomeiasaun lista aprezenta, Prezidente Repúblika hato’o kedas ba país sira ne’ebé ema sira atu destaka ba hodi hein sira-nia resposta. Maibé ha’u la fiar ema hirak ne’ebé propoin nu’udar embaixadór no konsuladu país sira ne’e halimar polítiku hodi dada fali to’o tempu naruk hanesan agora daudaun ne’e,”dehan Maria Angelina, iha Uma Fukun PN, foin lalais.

Nia dehan, maioria embaixadór sira iha rai li'ur diplomata karreira sira maka sai enkarregadu tanba seidauk simu pose.

Tuir nia, embaixadór enkarregadu normalmente to’o fulan tolu maibé kuandu liu ida ne’e bele fó impresaun la di'ak, liuliu iha nasaun ne’ebé reprezentante Estadu TL iha ba.

“Konsuladu enkarregadu ho tempu ida naruk tebe-tebes ne’e TL bele hatudu ba ema katak TL laiha kapasidade no laiha rekursu umanu sufisiente atu bele prienxe fatin sira ne’ebé embaixadór sira-nia mandatu hotu ona”, dehan eis Ativista ne’e.

Nia akresenta, embaixadór sira ne’e la'ós reprezenta partidu ida ne’ebé manan ninia imajen maibé reprezenta Estadu TL.

Rate this item
(0 votes)

Independente Digital TV