Hanesan tuir komunikadu ne’ebé diáriu ne’e asesu husi Gabinete Prezidénsia Repúblika, ho auzénsia Ministru Dionísio Babo nian iha serimónia pose ba embaixadór timoroan, iha Tersa (13/8) ne’e, ba dala tolu ona. Antes ne’e, iha karta kredensial ne’ebé aprezenta husi embaixadór balun ba Prezidente Repúblika ne’ebé presiza prezensa Ministru Dionisio Babo nian, maibe la marka prezensa hodi haruka ninia delegasaun ba Ministra Edukasaun, Dulce de Jesus Martins no Ministra Solidariedade Sosiál, Armanda Berta.
Liu husi komunikadu imprensa, Gabinete Prezidénsia Repúblika esplika katak, Xefe Estadu ezerse ninia kompeténsia tuir Konstituisaun RDTL artigu 87 alínea b katak, “Foti no hasai embaixadór, reprezentante permanente no enviadu estraordináriu sira, tuir proposta Governu nian”.
Ne’e duni, Embaixadór na’in tolu simu ona akordu iha tinan 2018 husi nasaun sira ne’ebé sei hala’o sira nia funsaun. Importante atu fó sai katak, embaixadór na’in tolu ne’ebé Xefe Estadu fó pose nu’udar diplomata karreira no funsionáriu superiór husi MNEK.
Atu fó tomada-de-pose Estadu TL simu ona akordu husi nasaun sira ne’ebé embaixadór akreditadu, iha loron 31 fulan-Jullu 2019. Nune’e, Gabinete MNEK haruka ofísiu ida (ref 1089/gm-MNEC/VII/2019) ne’ebé aneksa kopia akordu ba embaixadór na’in tolu atu halo nomeasaun no fó pose ba sira.
Tanba ne’e, Prezidente Repúblika publika dekretu tolu ba nomeasaun no fó sai ajenda serimónia tomada-de-pose ba loron 13 Agostu, iha tuku 09:30, iha Palásiu Prezidensiál. Iha komunikadu ne’e esplika mós katak, razaun Ministru Dionísio Babo katak la partisipa iha serimónia pose tanba la simu konvite, konsidera la razoavel no laiha fundamentu.
Tanba antes ne’e, iha loron 9 Agostu 2019, Prezidente Repúblika haruka ofísiu ida ba Xefe Gabinete MNEK atu informa kona-ba data serimónia ba tomada-de-pose, prosesu ne’e hotu hala’o ho dalan koordenada entre MNEK ho Prezidénsia Repúblika.
Sira na’in tolu ne’ebé simu tomada pose mós hanesan funsionáriu superiór MNEK ne’ebé sei reprezenta Estadu iha rai li’ur, nune’e MNEK sai indispensavel no tuir prátika baibain, laiha nesesidade atu haruka konvite hodi husu prezensa ministru iha tipu serimónia ne’e, ne’ebé prezide husi Xefe Estadu.
Antes ne'e, Ministru Reforma Lejizlativa Asuntu Parlamentár (MRLAP), Fidelis Magalhães deklara, hetan konfirmasaun husi Dionísio Babo katak, nia labele partisipa iha serimónia tomada-de-pose ba embaixadór timoroan na'in tolu ne'e tanba la hetan konvite husi Prezidente Repúblika.
“Razaun prinsipál ne’ebé iha mak ministru ne’e la hetan konvite, aumezmu tempu ministru nia-kondisaun saúde mós ladún di'ak,” dehan nia.
Maski iha deklarasaun ne’e katak, Ministru Dionísio Babo ninia kondisaun saúde ladún di'ak, maibé iha loron hanesan Ministru Dionísio ba halo hela aprezentasaun kona-ba prosesu preparativus Timor-Leste nia adezaun ba ASEAN, iha Timor-Plaza.
