Iha 13 Agostu foin lalais, PR Lu Olof ó pose ba Embaixadór Timor-oan na’in tolu la ho prezensa husi MNEK Dionisio Babo.

Molok ne’e, iha karta kredensial ne’ebé aprezenta husi embaixadór balun ba Prezidente Repúblika ne’ebé presiza prezensa Ministru Dionisio Babo nian, maibé ministru la marka prezensa hodi haruka ninia delegasaun ba Ministra Edukasaun, Dulce de Jesus Martins no Ministra Solidariedade Sosiál, Armanda Berta.

Enkuantu iha sorin seluk, Ministru Reforma Lejizlativa Asuntu Parlamentár (MRLAP), Fidelis Magalhães deklara, hetan konfirmasaun husi Dionísio Babo katak, nia labele partisipa iha serimónia tomada-de-pose ba embaixadór timoroan na'in tolu ne'e tanba la hetan konvite husi Prezidente Repúblika.

“Razaun prinsipál ne’ebé iha mak ministru ne’e la hetan konvite, aumezmu tempu ministru nia-kondisaun saúde mós ladún di'ak,” dehan nia.

Maibé, tuir komunikadu imprensa husi Gabinete Prezidénsia Repúblika katak iha loron 9 Agostu 2019, Prezidente Repúblika haruka ofísiu ida ba Xefe Gabinete MNEK atu informa kona-ba data serimónia ba tomada-de-pose, prosesu ne’e hotu hala’o ho dalan koordenada entre MNEK ho Prezidénsia Repúblika.

Ho nune’e, komunikadu ne’e dehan, razaun husi Ministru Dionísio Babo katak la partisipa iha serimónia pose tanba la simu konvite, konsidera la razoavel no laiha fundamentu.

Razaun seluk husi Ministru Babo bazeia ba informasaun husi Ministru Fidelis mak Ministru Dionísio Babo ninia kondisaun saúde ladún di'ak, maibé realidade iha loron serimonia pose Ministru Babo ba halo hela aprezentasaun kona-ba prosesu preparativus Timor Leste nia adezaun ba ASEAN, iha Timor-Plaza.

Ba kestaun ida ne’e, Ministru Babo dehan, nia la partisipa iha tomada pose husi PR Lu Olo ba embaixadór TL na’in tolu ne’e kestaun normal.

“Ohin ha’u esplika tiha ona ba Prezidente Repúblika, iha kestaun interna Prezidente Repúblika mós rona ona, ha’u hanoin ne’e kestaun normal ne’ebé akontese,” dehan Babo ba jornalista sira hafoin enkontru ho PR Lu Olo iha Palasiu Prezidensiál Bairu-Pite, Sesta (23/08).

Nia dehan, iha momentu ne’ebá, Xefe Gabinete no Sekretariu Jeral MNEK mak mai hola parte iha serimonia tomada pose.

“Normalmente bele reprezenta Ministru tanba ne’e simu pose embaixadór sira nian”.

Molok ne’e, Deputadu Parlamentu Nasionál konsidera asaun husi Ministru Dionísio ne’e iha tendénsia atu boikota pose ba embaixadór sira ne’e.

“Ha’u preokupa! Ita haruka reprezentante nasaun nian ba ema nia rain, maibé ministru ne’ebé toma konta ba ida ne’e la marka prezensa, serake ida ne’e parte husi boikota malu ka halo nusa,” dehan Vise-Prezidente Bankada Partidu Demokrátiku (PD), Adriano Nascimento, iha Plenária, iha PN, horisehik.

Deputadu ne’e sente Dionísio Babo la hatudu imajen di'ak iha públiku, bainhira fó pose ba embaixadór sira ne’ebé pertense ba ministériu ne’ebé nia-lidera.

“Ha’u hakarak husu justifikasaun tanba saida mak ministru ne’e la marka prezensa iha serimónia tomada pose ne’e”, tenik nia.

 Diskuti Lista Embaixadór Pendente

Entretantu, iha Sesta (23/08), PR Lu Olo bolu MNEK Babo hasoru-malu hodi ko’alia kona-ba lista embaixadór Timor Leste ne’ebé seidauk simu pose.

“Prezidente Repúblika bolu ha’u mai depois ko’alia ho Primeiru Ministru kona-ba kestaun lista ba embaixadór sira ne’e, reprezentasaun ita-nia rain iha li’ur ne’e mós hanesan reprezentasaun ne’ebé hatudu imajen Timor nian.”

“Prezidente Repúblika fó hanoin de’it kona-ba reprezentasaun sira ne’e, hanesan iha fatin ida hanesan ne’e tenke ema hanesan ne’e, iha fatin ne’e ema tenke hanesan ne’e, depois Xefe Estadu mós hanoin katak se bele tau mós ema sira kareira ne’e,” dehan Babo.

Tuir Ministru ne’e, hanoin husi PR Lu Olo ne’e pozitivu tebes tanba foin dahuluk instituisaun estadu sira preokupa no hakarak fó hanoin.

“Ha’u hanoin katak naran sira ne’e mais reprezenta ita-nia estadu iha future, ida ne’e Xefe Estadu fó atensaun maka’as tebe-tebes no mostra katak iha duni atensaun”.

“Ha’u hanoin ba futuru mós presiza haree didi’ak ba ema ne’ebé ba reprezenta ita-nia país ba reprezenta duni estadu,” nia hatutan.