Liu husi audensia julgamentu iha Sesta (16/08/2019), TDD deklara katak, faktu ne’ebé Ministériu Públiku aprezenta ladun sufisiente tanba la konsege prova mate-ruin ne’ebé daudauk ne’e sei rai hela iha mortuariu Ospital Nasionál Guido Valadares nu’udar Vera nia ruin ka lae.
Faktus seluk ne’ebé tuir TDD la aprovadu mak karreta ne’ebé MP akuza nu’udar karreta ne’ebé tula mate-isin laiha raan no katana ne’ebé deskonfia uza hodi oho Vera mós laiha raan.
Ba ida ne’e, parte defeza konsidera nu’udar kulpa ida ba Ministériu Públiku tanba laiha seriedade halo investigasaun klean hodi deteta mate-ruin ne’ebé deskonfia nu’udar Vera nia ruin.
Tuir defeza, MP laiha investigasaun ne’ebé kle’an atu haforsa iha akuzasaun maibé bazeia de’it ba investigasaun husi parte Polisia.
Defeza dehan, rezultadu investigasaun husi polisia ne’e bazeia de’it ba prosesu interogasaun ba arguidu sira ne’ebé momentu ne’ebé polisia obriga arguidu sira ho tudik estika arguidu nia kakorok atu deklara katak sira mak oho vítima.
“Ministériu Públiku iha papel tomak próteze lei, maibé laiha seriedade investigasaun klean ba kazu Verra, tanba saida kadavel (ruin) ida oras ne’e iha hela mortuariu ne’e seidauk iha rezultadu DNA katak ne’e Vera ka lae?.”
“Seluk fali arguidu sira sempre hetan ameasa ho tudik husi polisia sira atu obriga arguidu hatete sira mak oho," deklara defeza.
Parte defeza mós deklara duvida balun ba kazu ne’e. Duvida dahuluk mak bainhira defeza husu pedidu ba Ministériu Públiku no Polisia atu halo teste DNA ba mate-ruin, maibé parte sira la responde, sira bazeia de’it ba arguidu sira nia deklarasaun.
Duvida seluk mak iha momentu Vera lakon, mane ida ho naran Zaqueo mós lakon no to’o oras ne’e seidauk hatene ninia paradeiru. Zaqueo deskonfia nu’udar mane ne’ebé iha relasaun domin ho Vera.
Duvida balun tan mak tuir observasaun husi parte defeza, durante prosesu julgamentu ba kazu ne’e, laiha Vera nia familia ida mak mai partisipa.
Tuir indentifikasuan husi parte defeza, iha inisiu fulan Maiu tinan ne’e, Vera nia account Facebook sei ativa.
“Buat hotu fila ba ministériu públiku nia investigasaun, kuandu laiha investigasaun mak ne’e, falla boot, tanba autór judisiariu mós kontribui, hakarak kastigu ema ne’ebé mak duun de’it”.
Sei Halo Asaun Sivil Hasoru Polisia, MP no Familia
Entretantu advogadu privadu husi arguidu na’in haat, Adelina Maluk Lobo hatete, nia parte sei halo asaun sivil hasoru Polisia Nasional Timor Leste (PNTL), Ministeriu Publiku (MP) inklui mós familia Vera ba naran di’ak no indeminizasaun sivil ba ninia kliente na’in haat.
Adelina dehan, nia kliente na’in haat, Natalisto da Costa Ximenes, Joõo Tete Goncalves, Agustinho de Jesus, no Nicolao da Costa hela iha prizaun durante tinan ida, maibé ikus mai la konsege prova katak sira sala duni.
“Ha’u nu’udar defeza iha ona planu atu hatama asaun sivil rekoperasaun ba boa nome no indeminizasaun sivil,” dehan nia ba jornal INDEPENDNETE liu husi WhatsApp, foin lalais.
Defeza ne’e dehan, nia parte halo asaun refere hasoru PNTL no Ministériu Públiku tanba konsidera parte rua ne’e komete eru.
