2020, F-FDTL Rekruta Membru 600 Featured

By Domingos Gomes Setembru 14, 2019 15299
Polisia Militar Timor-Leste Polisia Militar Timor-Leste

DILI: Tuir planu iha tinan 2020, FALINTIL Forsa Defeza Timor Leste (F-FDTL) sei rekruta ema na’in 600 hodi serbisu iha instituisaun defeza ne’e.

Vise Xefe Estadu Maior F-FDTL, Brigadeiru Jenerál Domingos Raul alias “Falur Rate Laek” hatete, tinan barak ona F-FDTL la halo rekrutamentu ba membru foun, tan ne’e iha tinan oin, 2020, sei halo rekrutamentu.

Durante ne’e, nia dehan, F-FDTL la halo rekrutamentu tanba desizaun ne’ebé politiku-nain sira foti.

Ho nune’e, nia hatutan, kulpa la’os ba Komando F-FDTL maibé ba politiku na’in sira, no iha tinan oin, hakarak ka lakohi Komando F-FDTL tenke halo rekrutamentu.

“Tanba ne’e iha Outubru, fulan oin, ita tenke halo preparativu hodi halo rekrutamentu ba 600 membru F-FDTL, sei envolve feto-mane,” Informa Brigadeiru Jenerál Falur ba jornalista sira iha Komandu Komponente Formasaun Treinu Metinaru, Dili, Kinta (12/09).

Vise Xefe Estadu Maior F-FDTL ne’e informa mós katak iha tempu badak nia laran sei haruka tan membru F-FDTL hodi ba tuir misaun ONU nian iha rai li’ur.

“Ha’u hanoin komadante foun ne’ebé iha liu formasaun barak no produs ona sentru formasaun barak, ema ne’ebé sai mastradu ba formasaun linguistika, ofisiais superior iha ona, tanba ita mós treinu observadór ba militar, treinu ba peace keeping iha ona, ita hein katak, tempu badak nia laran sei haruka tan ita-nia forsa sira ba halo misaun ONU nian iha rai li’ur,” dehan Falur.

Falur afirma, F-FDTL tenke halo rekrutamentu tanba bainhira prepara sarjentu tenke iha ema atu sira komanda.

“Tanba ne’e planu ona 2020 tenke halo rekrutamentu, tanba situasaun kritiku liu ho situasaun pessoal, tanba ema graduadu agora barak, se ita prepara tiha sarjentu sira laiha ema sira komanda, entaun sira bele protesta fali komandu “nusa mak ha’u prepara tiha ona atu komanda, maibé ha’u ba fali iha seguransa?” ita lakohi atu akontese,” dehan nia.

Rate this item
(3 votes)

Independente Digital TV