Tan ne’e, Arão husu ba Komisaun A ne’ebé trata asuntu Konstituisaun no Justisa atu aselera lalais, tanba iha lejislasaun foun balun ne’ebé sei tama fali.

“Ita iha lei barak mak agora atu tama fali, hanesan lei preparasaun poder lokal, lei eleisaun lokal, lei orsamentu lokal, lei sira ne’e tama hotu iha area komisaun A nian, tanba ne’e mak ha’u husu komisaun A bele konklui lalais tiha LAP hodi bele passa fali ba lejislasaun importante sira seluk,” dehan Arão iha PN, Kinta (12/09).

Tuir informasaun ne’ebé Prezidente PN ne’e simu, Komisaun A foin aprova artigu 22.

Maske nune’e, Arão fiar katak Komisaun A sei konklui lalais tanba iha prosesu debate ba lei, artigu dahuluk ne’e mak prinsipiu fundamental no presiza tempu atu debate.

Maibé ba artigu no kapitulu sira seluk sei la haan tempu tanba artigu no kapitulu hirak ne’e atu halo de’it deklarasaun ba prinsipiu fundamental ne’ebé iha.

“Ha’u fiar katak ba oin lalais liu kona-ba prosesu debate iha proposta lei ne’e rasik,” dehan nia.