Tribunál Julga Tan Lúcia Lobato Featured

By Martinha Gusmao Fevereiru 01, 2018 3719
Lucia Lobato Lucia Lobato

DILI: Tribunál Distritál Dili (TDD), dala ida halo julgamentu ba eis-Ministra Justisa, Lúcia Lobato no arguida eis-Diretora Prizaun Gleno, Helena Madeira Gomes.

Arguida na’in rua ne’e Ministériu Públiku akuza ho krime Partisipasaun Ekonomia Negósiu, ne’ebé Previstu iha artigu 299 Kódigu Penál ho pena prizaun tinan rua (2) to’o tinan ualu (8).

Deskonfia, Eis-Ministra Justisa durante nia mandatu iha V Governu, fó projetu reabilitasaun prizaun Gleno ba nia família.

Maski reabilitasaun ne’e nia finalidade laiha kualidade, maibé Lúcia kontinua aprova no halo pagamentu ba obra ne’e.

Nune’e mós arguida na’in rua fó prejuizu ba Estadu ho montante orsamentu $120,695.49.

Arguida Lúcia Lobato iha tinan 2007 too 2009 hanesan ministra justisa iha VI governu konstitusionál. Arguida Helena iha tempu ne’ebá hanesan diretora iha Prizaun Gleno.

Tuir kronolojia, iha fulan Novembru 2007, arguida Helena sai fali hanesan Diretora Nasional Servisu Prizional Gleno.

Iha tempu hanesan dotasaun orsamentu ba prizaun iha programa 136 ho orsamentu $353.000 atu hola sasán ekipamentu ba konstrusaun prizaun Gleno nian. Dotasaun ba programa 131-DNSAFP ba manutensaun no konstrusaun ba edifísiu prizaun $100.000 ba utilizasaun $73.000.

Nune’e, orsamentu ne’ebé halo reabilitasaun ba edifísiu Prizaun Gleno ho montante $120,695.49.

Hataan ba akuzasaun ne’e, arguida Lúcia Lobato deklara ba Tribunál katak, kona-ba kondisaun Prizaun Gleno ne’e nia haree husi jornál katak kondisaun Prizaun agora daudaun ne’e nia kondisaun grave.

Tanba ne’e, hanesan Ministra Justisa iha momentu ne'ebá iha kompeténsia atu responsabiliza kona-ba ida ne’e.

Nia dehan, iha momentu ne’e Prizaun Gleno ninia parede la di'ak ona, hanesan Ministra Justisa tenke ba haree kondisaun sira ne’e.

Iha momentu ne’e nia ba vizita Prizaun Gleno nia kondisaun la di'ak duni, tanba Prizaun sira ne’e presiza hadi'a.

Iha momentu ne’e kedas, arguida simu kontesia husi nia gabinete, maibé osan hira nia la hatene, mezmu nia hatene kondisaun prizaun la di'ak.

Kontesia ne’e iha momentu ha’u simu ha’u haruka kedas ba iha Ministériu Finansas momentu ne’e Emília Pires nia Tempu. Tanba antes ne’e ha’u vizita ba Prizaun ne’e ha’u hato’o ba Primeiru Ministru hanesan Ministériu Justisa nia servisu,” deklara Lúcia.

Iha momentu ne’e, nia halo kontesia urjente ba Ministériu Finansas atu aprova lalais ho razaun kondisaun prizaun grave, maibé obra ne’e la'o ka lae ne’e kompeténsia husi Ministériu Finansas ho ida ne’ebé ne’e kaer obra ne’e, tanba projetu ne’e uza orsamentu governu anteriór nia, tanba iha momentu nia asume kargu iha tinan 2007.

Iha momentu prosesu aprovizionamentu la'o, nia laiha koñesimentu, tanba prosesu tinan 11 ona arguida Lúcia la lembra ona faktu sira ne’e.

Prizaun rua ne’e Gleno ho Baukau iha duni nesesidade atu hadi’a, maibé governu liu-liu Ministériu Justisa atu hadi'a. Iha Prizaun Gleno ne’e reabilitasaun ba sela lima.

Audiénsia julgamentu ne’e prezide husi juis koletivu, Jacinta Correia, Ana Paula Fonseca, Eusébio Xavier, Ministériu Públiku reprezenta husi prokuradór Jacinto Babo, Lídia Soares ho Rogério Viegas, arguida sira hetan asisténsia legál husi defensór públiku, Manuel Sarmento.

Rate this item
(0 votes)

Independente Digital TV