Polisia Kaptura Suspeitu Rua husi Grupu Rua Ataka Malu Featured

By Tomé Amado Janeiru 31, 2018 2260
Baku malu Baku malu

DILI: Komandu Polisia Nasionál Timor Leste (PNTL) Rejiaun Autónomu Espesiál Oekusi-Ambenu (RAEOA), kaptura suspeitu na’in rua ne'ebé deskonfia envolve iha asaun asaltu malu iha área Padimau, Pante Makasar.

Akontesimentu ne’e mosu iha 27 Janeiru 2018, maizumenus tuku 04:00 madrugada, asidente ne’e hahú iha festa uma. Joven lubuk ida ne'ebé mai husi grupu rua partisipa hotu iha festa kazamentu.

Antes ne’e, sira iha ona problema. Tan ne’e, sira provoka malu depois hahu duni malu.

Tuir kronolojia, grupu rua ne’e duni malu husi área Padimau mai to’o iha área Nunbei. Maibé, la konsege baku malu, entaun fasilidade uma tolu husi komunidade nian hetan estragu. Vidru janela rahun hotu.

Tuir sasin husi komunidade balun, grupu joven ne'ebé halo problema mak tuda ho fatuk.

Komandante PNTL RAEOA, Superintendente Arnaldo de Araújo hateten, akontesimentu ne’e sira kaptura ona suspeitu na’in rua. Detein hela iha sela komandu Polisia para atu submete ba prosesu investigasaun.

Arnaldo afirma tan katak, ninia parte identifika ona joven lubuk ida ne'ebé envolve iha asidente ne’e no polisia sei akompaña hela kondisaun tempu para atu halo kapturasaun ba sira.

Portantu husi informasaun balun ne'ebé espalla katak grupu rua asaltu malu ne’e deskonfia mai husi militante partidu balun, maibé Komandante Arnaldo afirma katak ne’e la loos. Grupu rua asaltu malu ne’e krime entre joven laiha indikasaun husi partidu.

Entretantu Komandante Jerál PNTL, Komisáriu Polisia Júlio Hornai da Costa hataan katak ema hotu iha lei nia okos, kuandu sé-sé mak komete iha krime dalan ikus mak responsabiliza ninia aktu.

Nia atu militante FRETILIN ka atu militante ne'ebé de’it, nia kuandu komete ona iha krime nia tenke ba hataan iha tribunál”, dehan nia, iha Kuartél Jerál F-FDTL, Fatuhada, horisehik.

Maibé sei liu lai husi investigasaun kriminál hafoin aprezenta ba tribunál, la’ós tuur de’it depois rona ema seluk mai hateten suspeitu sira ne’e mai husi militante partidu ida ne’e mak halo depois polisia mós foti ona medida ne’e la loos.

Rate this item
(1 Vote)

Independente Digital TV