Sexta, 06 Dezembru 2019 | Login
Komisariu Julio da Costa Hornai. FOTO: dok.INDEPENDENTE Komisariu Julio da Costa Hornai. FOTO: dok.INDEPENDENTE

Kazu Kuluhun, Komando Polisia Hein MP Halo Ezame Balistiku Featured

DILI: Komando Polisia Nasional Timor Leste (PNTL) to’o ohin sei hein hela Ministériu Públiku atu halo prosesu ezame balistiku ba kazu Kuluhun ne’ebé hamate joven na’in tolu.

Komandante Jeral PNTL, Komisariu Julio da Costa Hornai hatete, parte PNTL remata ona prosesu ba pesoal polisia na’in haat (4) ne’ebé deskonfia sai autór ba kazu Kuluhun no entrega ona ba Tribunal Munisipiu Dili.

“Ami ninia prosesu hasoru sira na’in haat remata ona, agora iha ona Tribunal. Ami hein de’it desizaun tribunal nian,” deklara Komisariu Julio ba jornalista jornal INDEPENDENTE hafoin serimonia Komemorasaun Aniversariu FALINTIL-Forsa Defeza Timor Leste (F-FDTL) ba dala18, iha Kuartel Jeneral, Fatuhada, Sabadu (02/02).

Kona-ba teste bala-musan, Komisariu Julio dehan, ne’e kompetensia Ministériu Públiku nian.

Entretantu, arguidu na’in rua ho inisial JA no FP hetan ona medida koasaun ho prizaun preventiva, no na’in rua seluk ho aprejentasaun periodika.

Ba membru na’in rua seluk ne’ebé hetan aprejentasaun periodika, Komisariu dehan, nia parte hein hela rezultadu husi ezame balistiku, bainhira rezultadu hatudu laiha envolvimentu Komando fó fila fali oportunidade ba sira atu kotinua ativu fali iha instituisaun seguransa.

Maibé ba daudauk ne’e, nia hatete, membru na’in rua ne’e la hala’o knar ka serbisu polisia nian.

“Sira la uza frada, inklui la lori armas hodi halo serbisu bainhira seidauk iha desizaun ka rezultadu ezame balisktiku ne’e,” dehan nia.

Read 2307 times
Rate this item
(0 votes)