Komandante Daruak Polisia Nasionál Timor Leste (PNTL) Munisipiu Dili, Superintendente Asistente Euclides Belo hatete, bainhira sidadaun ida hare ema ida halo krime iha sira-nia bairru Kodigu Prosesu Penal (KPP) fó dalan atu halo kapturasaun, maibé tenke fó hatene lalais ba Polisia, OPS, ka polisia eskudara ne’ebé besik.
Hafoin intrega suspeitu refere ba polisia, Euclides hatutan, polisia sei halo auto-partisipasaun no sidadaun ne’ebé kaptura suspeitu tenke asina auto-intrega hafoin polisia bele halo prosesu.
“Servisu (kaptura suspeitu) ne’e laos de’it polisia nian maibé ema babain ida mós bele halo, naran katak ema ne’e komete duni iha asaun krime ne’ebé ninia indikasaun ne’e bele astraga ema seluk,” dehan Euclides iha ninia knar fatin edifisiu komando PNTL Dili, Kaikoli, Kinta (31/01).
Entretantu, iha oportunidade ne’e, Euclides hatete mós katak Konsellu Polisiamentu Komunitaria (KPK) importante iha komunidade nia leet tan ne’e komunidade sira presiza atu iha koñesimentu ba knar KPK nian
Tan ne’e, nia dehan, polisia, liliu estrutura Konsellu Polisiamentu Komunitaria (KPK), kontinua halo aprosimasaun hodi esplika ba komunidade sira kona ba knar loloos KPK nian.
Tuir nia katak maske funsaun KPK nian atu identifika no halo mediasaun hodi apoiu serbisu polisia laos halo fali serbisu polisia nian, maibé kuandu situasaun obriga sira tenke halo duni serbisu ne’ebé loloos so polisia mak bele halo.
Tanba ne’e, nia husu ba estrutura KPK ne’ebé mak Komando Polisia harii ona iha suku no aldeia sira atu apoiu seguransa.
