Sábadu, 07 Dezembru 2019 | Login
Ilustrasaun dada ema-nia bibi ba uma. FOTO: JatimTimes Ilustrasaun dada ema-nia bibi ba uma. FOTO: JatimTimes

Dada Bibi ba Uma, Pesoal F-FDTL Hetan Baku Featured

DILI: Pesoal FALINTIL-Forsa Defeza Timor Leste (F-FDTL) ida ho inisial JSBM (32) hetan baku husi komunidade balun tanba deskonfia pesoal ho deviza Segundo Sarjentu ne’e naok bibi iha mate-uma besik Xina Rate, Taibessi.

Kazu ne’e akontese iha Domingu maizumenus tuku 16.25 bainhira JSMB ne’ebé foin fila halimar jogu toto bola kore no dada bibi ida ne’ebé bobar hela iha ai besik mate-uma.

Ema hirak ne’ebé mai iha mate-uma haree pesoal F-FDTL ne’e dada bibi ne’ebé nia kore ba nia uma iha area Aituri Laran, ho nune’e sira la’o tuir pesoal refere ne’ebé uza roupa sivil to’o nia hela fatin no hahú halo agresaun fiziku.

“Nia (pesoal F-FDTL) kore tiha bibi ne’e depois lori tiha. Ema sira iha mate uma ne’e haree mak duni tuir nia ba to’o Aituri Laran. Tanba nia hatais sivil entaun komunidade sira purada nia tasak didi’ak, ikus mai nia hasai ID card hodi hatudu katak nia membru F-FDTL,” informa Komandante Unidade Polisia Militar (PM) Maijor Abel da Costa Xavier “Niky” iha Kuartel PM, Kintal Boot, Segunda (11/02).

Hafoin simu informasaun kona-ba kazu ne’e, Komandante PM ne’e dehan, nia fó orden ba ninia ekipa hodi ba foti pesoal refere iha fatin akontesimentu.

“Ami detein ona pesoal militar ne’e iha ami-nia kuartel unidade PM hodi halo prosesu, relasiona mós ho keixa balun ne’ebé mak mate-nain sira aprejenta ona,” dehan nia.

Niky hatutan rezultadu husi prosesu investigasaun hasoru pesoal ho deviza Segundo Sarjentu ne’e sei aprejenta ba Xefe Estadu Maijor F-FDTL, Major Jeneral Lere Anan Timur.

Hafoin halo prosesu ba pesoal militar ne’e, Niky dehan, sei bolu mós ema sira ne’ebé halo agresaun fiziku hasoru JSMB atu rona sira-nia deklarasaun.

Iha oportunidade ne’e, Komandante PM lamenta no rekuza públikasaun iha media sosial ne’ebé hatete katak pesoal refere nu’udar membru PM.

“Nia ami-nia membru (F-FDTL) duni maibé laos husi Unidade Polisia Militar, nia instrutór ida husi Sentru Formasaun Treinu (CFT) Metinaro,” informa Komandante PM ne’e.

Iha fatin ketak, mate-nain Francelino Guterres ne’ebé hetan konfirmasaun husi jornalista sira deklara lakohi fó komentariu detallu ho razaun kazu ne’e entrega ona ba PM.

“Ha’u laiha komentariu ida kona-ba kazu ne’e. Tanba ha’u mai ona hato’o informasaun ba Komando PM. buat hotu sira mak sei halo,” dehan nia.

Read 2617 times Last modified on Kuarta, 13 Fevereiru 2019 17:41
Rate this item
(0 votes)
MidAd1