Prezidente Parlamentu Nasionál Arão Nóe de Jesus hatete, Vicente Guterres la’os ona deputadu tan ne’e tribunal bele hasai notifikasaun atu nia bele hatan iha tribunal.

Arão esplika, atu hasai imunidade ne’e so ba deputadu titular 65 ne’ebé hala’o hela sira-nia funsaun iha Parlamentu Nasionál.

Prezidente PN ne’e afirma, iha konstituisaun hatete katak hasai imunidade ba de’it deputadu no membru governu atual ne’ebé hala’o hela funsaun, tan ne’e ba Vicente Guterres hanesan eis titular la presiza hasai fali ninia imunidade hafoin bele ba hatan iha Tribunal relasiona ho kazu ruma.

“Vicente Guterres la’os ona deputadu, Tribunal hala’o nia knar de’it, la’os ema iha li’ur mós ita hasai hotu imunidade, ne’e la’e,” dehan Arão iha PN, Segunda (11/02).

Arão informa katak, foin lalais Tribunal haruka karta ba PN hodi husu atu hasai imunidade, maibé PN hatan katak Vicente Guterres la’os ona membru Parlamentu Nasional.

Iha fatin hanesan, Vise Prezidente Bankada FRETILIN, Francisco Miranda Branco hatete, Vicente Guterres la’os ona deputadu maibé hanesan eis Prezidente PN.

Nia hatutan, justisa iha rai ne’e tenke ba ema hotu-hotu, labele haree ba Kiik ka boot, kiak ka riku, metan ka mutin, maibé ema hotu-hotu tenke hanesan iha justisa nia oin.

Branco afirma, tempu ona ba eis titular sira ne’ebé deskonfia envolve iha aktu krime ruma atu hetan justisa nune’e bele fó mensajen di’ak ba povu tomak katak justisa ne’e la’os ba ema kiik de’it.

“Tempu ona atu investiga ema sira ne’ebé deskonfia komete kazu ruma, ita labele dada hela de’it,” dehan nia.