Domingu, 17 Novembru 2019 | Login
Aimoruk PCC Aimoruk PCC

Arguidu Aimoruk PCC Halai, La’ós Kulpa Migrasaun Featured

DILI: Arguidu ba importasaun Paracematol Caffeine no Carisoprado (PCC) konteiner sia, Mohammad Camal, ne’ebé halai ona husi Timor-Leste, Polisia Migrasaun rejeita atu simu ninia kulpa. Tanba depois prosesu ne’e la’o laiha koordenasaun husi tribunál no Polisia Nasionál Servisu Investigasaun Kriminál (PNSIK).

Mohammad Camal nu’udar arguidu ida husi ema na’in tolu ne’ebé identifikadu hatama ai-moruk PCC konteiner sia. Arguidu ne’e halai husi Timor-Leste, hafoin Tribunál Distritál Dili (TDD) aplika Termu Identidade Rezidénsia (TIR) ba sira.

Diretór Jerál Servisu Migrasaun, Superintendente Asistente Boavida Ribeiro hateten, Servisu Migrasaun konsidera kazu hatama ai-moruk PCC iha nafatin prosesa kriminál seidauk tama iha prosesu administrativu.

Tanba ne’e sei prosesu tomak sei la’o iha PNSIK nia-liman, tanba seidauk entrega mai Diresaun Servisu Migrasaun, inklui dokumentu sira.

Nia esplika, loloos kazu sira ne'ebé hetan envolvimentu ema estranjeiru, kuandu ninia prosesu remata ona tenke aprezenta ba Migrasaun.

Ne'e duni, suspeitu Mohammad Camal ne'ebé dehan halai sai ona husi TL, migrasaun la hatene.

“Ami laiha informasaun. Ami la hatene no ami rasik mós la simu kazu ne’e ho didi’ak. Tan ne’e, atu dehan fase liman ami bele fase liman”, tenik nia, iha servisu fatin, Vila-Verde, horisehik.

Arguidu Camal hamutuk ho arguidu na’in rua sira seluk Polisia Nasionál Timor Leste (PNTL) kaptura iha loron (23/1), hafoin identifika sira hatama materiál produs droga ho tipu PCC konteiner sia (9) mai Timor-Leste.

Ai-moruk primária produsaun droga ne’e tula husi nasaun Xina ho ró, liu husi Singapura hodi tama mai territóriu Timor. Konteiner hirak ne’e tuir planu atu distribui tutan ba Indonézia ho fatin destinatáriu Sulawesi.

Nune’e, hafoin halo aprensaun, PNTL no Ministériu Públiku lori sampel ai-moruk hirak ne’e ba halo ezame iha Indonézia no rezultadu pozitivu, katak ai-moruk ne’e iha poténsia hodi produs droga.

Ai-moruk konteiner sia ho totál tonelada 162 iha ai-moruk oin 18 mak teste, rezultadu pozitivu tebes para suporta investigasaun inisiál ne’ebé halo ona.  

Read 410 times
Rate this item
(0 votes)